Serye ni Gerald binago ang script para kay Dawn

Nagkaroon daw ng kaunting pagbabago sa script ng teleseryeng Bukas Na Lang Kita Mamahalin partikular na sa karakter ni Dawn Zulueta. Matatandaang una nang napabalita na si Maricel So­riano ang gaganap bilang ina ni Gerald Anderson sa nasabing proyekto pero hindi ito natuloy kaya napunta kay Dawn ang role. “In-adjust nila ng konti. Tama ‘yung sinasabi ni Sir Deo (Endrinal), dahil nagbago ng actress they need to tailor fit it also. Kasi I feel comfortable naman, when I read the lines kumportable naman ako. I don’t feel naman na, ‘Ay! Parang hindi naman ata ‘yan character ko.’ Masaya sa set, enjoy kami. Pondo lang kami nang pondo ng episodes,” kwento ni Dawn.

Makakasama rin nina Dawn at Gerald sa serye sina Cristine Reyes, Rayver Cruz, Diana Zubiri, Tonton Gutierrez, at Dina Bonnevie.

Bukod sa soap opera ay isang pelikula rin daw ang pinaghahandaan ni Dawn kung saan maka­ka­tambal niyang muli si Richard Gomez. “Right now we are under negotiation with Star Cinema. I think naman it will happen,” pagtatapat ng aktres.

Samantala, excited na rin si Dawn para sa kanyang guest appearance sa nalalapit na concert ni Vice Ganda sa Araneta Coliseum. “Hindi ko pa alam kung anong gagawin ko, we’ll see. I am excited about it,” pagtatapos niya.

Anne na-master na ang pagde-dedma

Isa si Anne Curtis sa may pinakamaraming followers sa social networking site na Twitter. Mahigit apat na milyon na ang followers ng aktres at ilan daw sa mga ito ay bashers ni Anne. Hindi na lamang daw pinapansin ng dalaga kapag may mga negatibong sinasabi tungkol sa kanya. “As I always say, learn the art of dedma. Me, I don’t mind if it’s about me. Ayoko lang talaga kasi if tungkol sa family ko, medyo pumapatol talaga ako ng very light and charming lang lalo na when it’s medyo below the belt,” paliwanag ni Anne.

Pinayuhan daw ang aktres ng kanyang ama tungkol sa mga mapanirang salita na ibinabato sa kanya ng mga bashers. “My dad also said that these people, ginagawa nila ‘yan for 5 minutes of fame and it’s up to you if you’re gonna give it to them. So huwag na lang, dedma na lang, learn the art of dedma,” giit pa niya. Kahit may mga bashers ay nagpapasalamat pa rin ang aktres dahil milyun-milyon na ang followers niya. Isa raw itong pagpapatunay na talagang mas marami pa rin ang sumusuporta sa kanya. “I’m just so happy that these people can connect to me and I’m lucky enough that it reached the 4 million mark so sobra akong nagpapasalamat. Kasi when you think about it, 4 million is a crazy amount of people. It’s a great way also kasi nga meron kang instant feedback from your followers, and when I have time naman I try to reply,” nakangiting pahayag ni Anne.

Reports from JAMES C. CANTOS