Gomez hari ng bigfoot 10-ball challenge

MANILA, Philippines — Inilabas ni Roberto Gomez ang naitatago nitong talento upang pagharian ang 2018 Derby City Classic Bigfoot 10-Ball Challenge na ginaganap sa Horseshoe Southern India­na sa Elizabeth, Indiana sa Amerika.

Kinailangan ni Gomez ng solidong laro upang itakas ang makapigil-hini­ngang 11-10 panalo laban kay reigning World Junior Championship titlist Fedor Gorst ng Russia sa kanilang championship showdown.

Hawak ni Gomez ang 6-5 kalamangan subalit nagmintis ito sa 10-ball sa 12th rack upang makabalik sa porma si Gorst at maitabla ang laro sa 6-6.

Nagawa pang umabante ni Gorst  sa 9-8 ngunit mabilis na nakabalik sa porma si Gomez nang kubrahin nito ang tatlo sa huling apat na racks para matamis na angkinin ang kampeonato.

Naibulsa ni Gomez ang tumataginting na $16,000 premyo habang nagkasya si Gorst sa $8,000 konsolasyon.

Nakapasok sa finals si Gomez nang patalsikin ang da­ting world champion na si Mika Immonen ng Finland sa bisa ng 11-10 panalo sa kanilang semifinal match.

Kabilang din sa mga tinalo ni Gomez sina 2017 China Open champion Joshua Filler ng Netherlands sa quarterfinals, 11-6  at kababayang si dating World 9-ball at World 8-ball champion Ronnie Alcano sa first round, 11-10.

Sa kabilang banda, si Gorst ang nagpatalsik sa Pinoy cue masters na sina 2004 World 9-Ball winner Alex Pagulayan sa first round (7-11) at Jeffrey De Luna sa quarterfinals (11-4) gayundin kay John Morra ng Canada sa semifinals (11-5).

Nauna nang yumuko sina Lee Vann Corteza at Dennis Orcollo laban kina Morra (7-11) at Immonen (7-11) sa kani-kanilang first-round games.

Sunod na lalaruin ang 9-Ball, One-Pocket Challenge at 9-Ball Banks Division.

Ang manlalarong makalilikom ng pinakamataas na puntos matapos ang apat na events sa Derby City Classic ang siyang tatanghaling Master of the Table.