Gomez sasargo sa semis
Pinatalsik ni Gomez si 2017 China Open champion Joshua Filler ng Netherlands sa pamamagitan ng 11-6 panalo upang masiguro ang pag-entra sa Final Four ng event na may nakalaang kabuuang $32,000 premyo. FIle
DCC bigfoot 10-ball challenge
MANILA, Philippines — Tuloy ang matikas na ratsada ni Roberto Gomez nang humirit ito ng tiket sa semifinals ng 2018 Derby City Classic Bigfoot 10-Ball Challenge na ginaganap sa Horseshoe Southern Indiana sa Elizabeth, Indiana sa Amerika.
Pinatalsik ni Gomez si 2017 China Open champion Joshua Filler ng Netherlands sa pamamagitan ng 11-6 panalo upang masiguro ang pag-entra sa Final Four ng event na may nakalaang kabuuang $32,000 premyo.
Makakasagupa ni Gomez sa semis ang magwawagi sa pagitan nina Shane Van Boening ng Amerika at Mika Immonen ng Finland.
Nauna nang tinalo ni Gomez ang kababayang si World 8-Ball at World 9-Ball champion Ronnie Alcano sa first round sa iskor na 11-10.
Hindi naman pinalad si Jeffrey De Luna na umabante matapos yumuko kay Fedor Gorst ng Russia sa kanilang quarterfinal match, 4-11.
Nakapasok sa quarterfinals si De Luna nang gapiin nito si Konrad Juszczyszyn ng Poland sa kanyang unang pagsalang (11-7) bago natalo kay Gorst.
Si Gorst din ang nagpatalsik kay 2004 World 9-Ball winner Alex Pagulayan, 7-11.
Talo rin sina Lee Vann Corteza at Dennis Orcollo.
Yumuko si Corteza kay John Morra ng Canada (7-11) habang natalo si Orcollo kontra kay Immonen (7-11).
Nakalaan ang $16,000 premyo para sa magkakampeon sa Bigfoot 10-Ball Challenge habang ang runner-up ay magkakamit ng $8,000.
Tatanggap naman ng tig-$4,000 konsolasyon ang mga matatalo sa semifinals.
- Latest
