Guiao, Ross iwas suspensyon

Sa multa hindi

MANILA, Philippines — Kagaya ng pahayag ni NLEX head coach Yeng Guiao, hindi siya nagbitaw ng racist remark kay point guard Chris Ross ng nagdedepensang San Miguel sa kanilang mainitang bakbakan sa 2018 PBA Philippine Cup noong Biyernes sa Cuneta Astrodome sa Pasay City.

Kaya naman multang P11,000 lamang ang ipinataw kay Guiao kahapon ni PBA Officer-In-Charge Willie Marcial, samantalang P2,600.00 kay Ross.

Ang nasabing multa kay Guiao ay para sa ginawa nitong "obscene gesture, use of profane language and engaging in a verbal altercation" kay Ross.

Ang dalawang technical fouls naman ni Ross ay may katumbas na multang P2,600.00.

Sa huling 1:46 minuto ng fourth quarter ay nagkasagutan sina Guiao at Ross na nagresulta sa kaguluhan ng mga bench ng NLEX at San Miguel.

Parehong tinawagan sina Guiao at Ross ng technical fouls para sa kanilang verbal altercation na nagresulta sa pagkakatalsik sa laro ng Fil-Am point guard.

Sinabi ni Ross na tinawag siyang 'nigger' ni Guiao na mariin namang pinabulaanan ng veteran coach.

“Upon review of the incident, consulting possible witnesses to the event and discussing the matter with both parties, the alleged racist remark attributed to coach Guiao could not be established,” wika ni Marcial sa kanyang statement.

“Coach Guiao has denied such allegation while Chris Ross has opted to move forward and said that he would not want to discuss the matter further. However, Coach Guiao and Chris Ross will be subject to appropriate fines for their respective misconduct,” dagdag pa nito.

Iginiit ng PBA OIC na walang lugar sa liga ang mga racist remarks.