Pacquiao-Crawford fight pa-plantsahin ni Arum kung...
MANILA, Philippines — Sakaling manalo si Manny Pacquiao sa kanyang laban sa Abril at maagaw ni Terence Crawford ang world welterweight crown kay Jeff Horn ay tuluyan nang seselyuhan ni Bob Arum ng Top Rank Promotions ang bakbakan ng Filipino legend at ng American superstar sa Nobyembre.
Ito ang plano ni Arum para sa 39-anyos na Filipino world eight-division champion bago ang inaasahang pagreretiro bago matapos ang 2018.
“One thing about Arum, he wants Manny to fight Crawford at the end and try to make him a big superstar, of course,” sabi ni Freddie Roach.
Nadiskaril ang pinag-uusapang laban nina Pacquiao (59-7-2, 38 KOs) at world super featherweight king Vasyl Lomachenko (10-1-0, 8 KOs) matapos tanggihan ng manager ng Ukrainian star ang catchweight fight kay ‘Pacman’ sa Abril.
Sinabi ni Roach na maaaring bumaba ng weight class si Pacquiao para lamang labanan ang 29-anyos na si Lomachenko, ang World Boxing Organization super featherweight titlist.
Plano ng kampo ni Lomachenko na ilaban ang two-time Olympic Games gold medalist sa lightweight division.
Gusto ni Arum na isagupa si Pacquiao sa isang mabigat na tune-up fight bago hamunin ang mananalo sa championship fight nina Crawford at Jeff Horn.
- Latest