Gomez pasok sa Last 8

Derby City classic

MANILA, Philippines — Kinailangan ni Roberto Gomez na dumaan sa butas ng karayom bago itakas ang 11-10 panalo laban sa kababayang si Ronnie Alcano upang umusad sa quarterfinals ng 2018 Derby City Classic na ginaganap sa Horseshoe Southern Indiana sa Elizabeth, Indiana sa Amerika.

Nagawa pang umabante ng dating World 9-Ball champion at World 8-Ball titlist na si Alcano hawak ang 9-8 kalamangan.

Subalit nagmintis ito sa huling bahagi ng laro upang tuluyang makuha ni Gomez ang panalo.

Makakasagupa ni Gomez sa Last 8 si Joshua Filler ng Netherlands na nagsumite ng 11-7 panalo kontra kay Jayson Shaw ng Scotland.

Hindi naman pinalad si reigning Master of the Table champion Dennis Orcollo nang lumasap ito ng 7-11 kabiguan sa kamay ni Mika Immonen ng Finland sa first round ng Bigfoot 10-Ball Challenge na may kabuuang $32,000 premyo.

Nakatakda pang mag­laro sina Jeffrey De Luna, Alex Pagulayan at Lee Vann Corteza laban sa kani-kanilang karibal sa first round habang sinusulat ito.

Titipanin ni De Luna si Konrad Juszczyszyn ng Poland habang sasagupain naman ni Pagulayan si Fedor Gorst ng Russia.

Makakalaban ni Corteza si John Morra ng Ca­nada.

Ang magkakampeon sa Bigfoot 10-Ball Challenge ay tatanggap ng $16,000 premyo habang ang runner-up ay magkakamit ng $8,000.

Mayroon ding $4,000 konsolasyon para sa mga matatalo sa semifinals.

Matapos ang Bigfoot 10-Ball Challenge, sunod na lalaruin ang 9-Ball, One-Pocket Challenge at 9-Ball Banks Division.