500 swimmers lalangoy sa 129th PSL National Series
MANILA, Philippines — Magtatagisan ang mahigit 500 swimmers mula sa iba’t ibang panig ng bansa sa 129th Philippine Swimming League (PSL) National Series - Lions Swim Challenge na lalarga ngayong araw sa Rizal Memorial Sports Complex swimming pool sa Malate, Manila.
Paglalabanan ang gintong medalya sa tatlong kategorya - ang Class A and B, Class C at Motivational kung saan puntirya ng mga kalahok na makasikwat ng silya sa koponang ipadadala sa 2019 Summer World University Games sa Naples, Italy.
Maliban sa Summer World University Games, ang torneo ay magsisilbi ring tryout para sa international tournaments sa Japan, Thailand, Hong Kong, Singapore, Amerika at United Arab Emirates.
“We look forward for a blast off competitions for Universiade aspirants. PSL is really in a grassroots development program since it caters the youngest two years old up to oldest of 18 and over,” pahayag ni PSL President Susan Papa.
Magbabakbakan ang mga kalahok para sa gintong medalya sa 6-under, 7-year, 8-year, 9-year, 10-year, 11-year, 12-year, 13-year, 14-year at 15-over sa boys at girls kung saan ang mangungunang mga tankers sa bawat kategorya ay gagawaran ng kani-kanilang Most Outstanding Swimmer awards.
“Swimmers must undergo this process of development as there is no shortcuts in sports, it is measured by time and PSL can not go wrong in giving rise to athletes. At the end, it must be parallel with our goal of having sound mind and body,” dagdag ni Papa.
Sasabak ang pambato ng NCR ngunit mapapalaban ang mga ito sa matitikas na tankers mula sa Cebu, Bacolod, Davao, Bicol, Cavite, Bulacan, Laguna, Quezon at Batangas.
- Latest
