Abugado ni Vargas naghain ng motion

MANILA, Philippines — Matapos ipahayag ng kampo ni Jose “Peping” Cojuangco na kukuha sila ng injunction sa Court of Appeals ukol sa iniutos ng Pasig RTC na eleksiyon sa POC sa Pebrero 23, naghain naman agad ng motion ang abogado ni Ricky Vargas sa sala ni Judge Maria Cadiz-Casaclang.

Ayon kay George SD Aquino ng ACCRA Law Office na naghain sila kahapon ng motion sa Pasig Regional Trial Court Branch 155 para hingin kay Judge Casaclang na tahasang utusan  ang Executive Board at ang Election Committee ng Philippine Olympic Committee na magsagawa ng special eleksyon para sa presidente at chairman sa darating na Pebrero 23.

“We requested the court to already direct the POC executive board and the election committee to do all necessary acts to effect the election. We believe this is a ministerial act of said POC committee to follow a court order and we are confident said elections will be held forthwith,” sabi ni Aquino kahapon.

Kahit pa man maghain ng apela ang POC Board sa CA, wala pa rin itong epekto dahil ang utos ni Judge Cadiz-Casaclang ay “immediately executory” kaya matutuloy pa rin ang nasabing special election, ayon kay Aquino.

Matatandaang sina Vargas at Rep. Abraham Tolentino ay diniskwalipika sa POC eleksiyon noong Nobyembre 25, 2016 dahil sa kakulangan ng attendance sa General Assembly meetings.

Ngunit, pinawalang bisa naman ni Judge Cadiz-Casaclang ang nasabing eleksyon sa posisyon ng presidente at chairman noong Disyembre 1, 2016 kaya inutusan ang POC na magdaos ng panibagong eleksyon sa mga nasabing posisyon ngayong Pebrero 23.

Dahil sa pagka-dis­kwalipika ni Vargas at Tolentino, nanalo ang 82-anyos na si Cojuangco na walang kalaban.