Beermen iiwas mapingasan vs NLEX

MANILA, Philippines — Maagang nagpakita ng kanilang dominasyon ang nagdedepensang San Miguel matapos magposte ng 3-0 panimula.

Dinaig ng Beermen ang Phoenix Fuel Masters, 104-96, Meralco Bolts, 103-97 at  TNT Katropang Texters, 88-76 para bumandera sa elimination round ng 2018 PBA Philippine Cup.

“Importanteng makapuhunan ng panalo,” sabi ni head coach Leo Austria sa kanyang San Miguel na sasagupa sa mapanganib na NLEX ngayong alas-7 ng gabi sa Cuneta Astrodome sa Pasay City.

Sa unang laro sa alas-4:30 ng hapon ay magsasalpukan naman ang Blackwater at Globalport.

Muling sasandal ang Beermen kina four-time PBA Most Valuable Player June Mar Fajardo, one-time PBA MVP Arwind Santos, Alex Cabagnot, Marcio Lassiter at Chris Ross.

Determinado naman ang Road Warriors na makabangon mula sa 94-105 kabiguan sa Magnolia Hotshots kung saan nagtala si rookie sensation Kiefer Ravena ng 31 points, 5 assists, 4 rebounds at 4 steals noong Linggo.

“With our system, we always won more games when more people got involved and more people scored in double figures,” sabi ni NLEX mentor Yeng Guiao. “Kiefer played a great game offensively but he did not get enough support from the rest of the team.”

Sa unang laro, pupuntiryahin naman ng Batang Pier ang kanilang ikalawang sunod na panalo sa pagsagupa sa Elite.

Hangad naman ng Blackwater na makabawi matapos makatikim ng 83-92 kabiguan sa TNT Katropa noong Miyerkules.