Carolino, Dela Cruz tumawid sa Perlas Spikers
MANILA, Philippines — Uso rin ang rigodon ng coaches sa Premier Volleyball League.
Ipaparada ng Perlas Spikers sina Ariel dela Cruz at Michelle Carolino bilang bagong coaches ng tropa kapalit ni Thai Nai Muhammed.
Sa pagpasok ng dalawang beteranong mentors, umaasa ang Perlas na mas magiging maganda ang kanilang kampanya sa PVL Reinforced Conference na magsisimula sa Abril 1.
Malalim na ang karanasan ni Dela Cruz na dating miyembro ng National University women’s volleyball team sa UAAP.
Dating miyembro ng national team si Carolino at nakapaglaro rin para sa Philippine Army Lady Troopers sa liga.
Makailang beses din itong kinuhang guest player ng De La Salle University na nagkampeon sa mga unang taon ng Shakey’s V-League (ang dating pangalan ng PVL).
Noong nakaraang taon, nagkasya lamang sa ikalimang puwesto ang Perlas Spikers sa Reinforced Conference at Open Conference.
“Our coaches starting this PVL season are Ariel dela Cruz and Michelle Carolino and we’re optimistic the team will have a better year,” wika ni Charo Soriano na dating miyembro ng Ateneo de Manila University at isa sa founders ng Beach Volleyball Republic.
Papalo para sa Perlas Spikers sina dating V-League MVP Suzanne Roces, Kat Bersola, Amanda Villanueva, Jem Ferrer, Ella de Jesus, Gizelle Tan, Nicole Tiamzon, Mae Tajima at Amy Ahomiro.
Inaasahang madaragdagan pa ito ng mga manlalaro mula sa UAAP teams sa oras na matapos ang Season 80 ng liga.
Ang Perlas Spikers ang ikatlong koponan sa PVL na nagpalit ng coach.
Nauna nang lumipat si Roger Gorayeb sa PLDT mula sa kanyang dating tropa na BaliPure Water Defenders na siyang itinanghal na Open Conference champions habang kinuha ng three-time PVL titlist Pocari Sweat si Jasper Jimenez bilang bagong head coach.
Pinalitan ni Jimenez si Rico De Guzman na inilipat sa posisyon bilang team manager.
- Latest
