Alab Pilipinas nagpaulan ng tres sa Bangkok
MANILA, Philippines — Nagpa-ulan ng 14 triples ang Tanduay-Alab Pilipinas para tambakan ang Thailand Mono Vampire, 114-87 noong Linggo ng gabi upang masungkit ang kanilang pang-apat na panalo sa pagpapatuloy ng 2017-2018 ASEAN Basketball League sa Stadium 29 sa Bangkok, Thailand.
Ganado ang tropa ni head coach Jimmy Alapag sa umpisa pa lamang at bumanat agad sina Bobby Ray Parks, Josh Urbiztondo at Justin Brownlee tungo sa malaking panalo para manatili sa pang-anim na puwesto sa likuran ng nangunguna at nagdedepensang Hong Kong Eastern Lions (7-1), Chong Son Kung Fu ng China (4-1), Saigon Heat (4-2), Mono Vampire (5-4) at Singapore Slingers (5-5).
Sa kanilang run-and-gun game, lumamang agad ng 20-9 ang Filipino team at 32-22 sa unang yugto. Sa mainit na kamay, umabot pa sa pinakamalaking 33 puntos ang agwat ng Filipinos, 104-71 sa triple ni Brownlee mahigit 6:46 pa ang natitira sa laro.
Umarangkada si Urbiztondo ng limang triples sa 5-of-10 shooting sa three-point area habang si Parks Jr. ay kumunekta rin ng tatlo sa 3-of-6 at tatlo rin mula kay Brownlee at dalawa kay Pamboy Raymundo at isa kay Rico Maierhofer sa buong laro para maibalik ang kanilang tiwala sa koponan matapos ang kabiguan sa Singapore Slingers noong Miyerkules.
Umiskor ang Pinoy cagers ng 41 porsyento sa three-point area sa 14-of-34 kaya umabot din sa malaking 48 porsyento ang kanilang shooting sa field goal sa 46-of-94 attempts. Dominado rin ng tropa ni coach Jimmy Alapag ang rebound department sa kanilang naitalang 45 na tumabon sa 38 lang ng Thailand.
- Latest
