18 PSL tankers wagi ng MOS sa Capiz meet
Sina Philippine Swimming League President Susan Papa at Secretary General Maria Susan Benasa at Capiz Turbo Shark coach Pepe Borres kasama ang mga Most Outstanding Swimmer awardees. CCo
CAPIZ, Philippines — May 18 tankers ang ginawaran ng Most Outstanding Swimmer (MOS) awards sa 128th Philippine Swimming League (PSL) National Series - Langoy Capiz Swimming Championship na ginanap sa Villareal Sports Complex swimming pool sa Roxas City.
Pinangunahan ng magkapatid na sina Michael Gabriel at Natazha Alexia Lozada ang listahan matapos mamayagpag sa kani-kanilang events.
Winalis ni Michael Gabriel ang lahat ng limang ginto (50 puntos) para mangibabaw sa boys’ 11-year category habang nakalikom si Natazha Alexia ng 44 puntos upang mamayagpag sa girls’ 13-year event.
Umariba rin sina Aklan bets Jennuel Booh De Leon (boys’ 12-year) at Rafa Francesca Dela Cruz (girls’ 11-year) gayundin sina Capiz Turbo Shark Swim Club tankers Jamie Michaela Refugio (girls’ 10-year) at Mark Anthony Garcia Jr. (boys’ 10-year).
Wagi rin ng MOS sina King Elijah Roberto (6-under), Keefe Yvange Alba (8), Lance Magno (9), Renjie De Miguel (13), Khraven Brian Villareal (14) at Carl Steven Inquina (15-over) sa boys class.
Ang iba pang MOS sa girls ay sina Dominique Sombito (7), Joan Perlas (8), Kate Zaira Roberto (9), Jaime Michaela Refugio (10), Marla Reina Nazareta (12), Melrose Pauline Aleligay (14) at Celine Ann Delotavo (15-over).
Tatlong bagong rekord ang naitala sa torneo mula kina Michael Gabriel (boys’ 50m backstroke, 34.69), Sombito (girls’ 7-year 200m freestyle, 3:18.91) at King Elijah Roberto (boys’ 6-under 200m freestyle, 4:35.93).
Itinanghal na overall champion ang Aklan Swimming Team na nakalikom ng 819 puntos habang pumangalawa ang Capiz Turbo Shark Swim Club (772) kasunod ang Poseidon Estancia (380), Capiz Eaglerays (310) at Sta. Fe Bulldog (130).
- Latest
