Tanduay-Alab Pilipinas pilit dadalawahan ang Slingers
MANILA, Philippines — Matapos makabawi ay hangad ng Tanduay-Alab Pilipinas ang ikalawang sunod na panalo laban sa Singapore Slingers sa kanilang muling pagtatagpo ngayong alas-8 ng gabi sa 2017-2018 ASEAN Basketball League sa FilOil Flying V Arena sa San Juan City.
Nangangailangan ng overtime ang tropa ni head coach Jimmy Alapag para kunin ang 89-80 panalo sa kanilang ikalawang laban noong Linggo sa OCBC Arena sa Singapore upang makabawi sa 83-97 pagkatalo sa una nilang pagtatagpo noong Nobyembre 29 sa Sta. Rosa, Laguna.
Kaya inaasahan ang mainit na laban sa kanilang pangatlong paghaharap ngayong season.
Tangan ang 3-3 kartada, kailangan ng Alab Pilipinas na manalong muli para maging mahigpit ang kapit sa ikaapat na puwesto sa likuran ng nangungunang Hong Kong Eastern Lions (7-0), Chong Son Kung Fu (4-0) at Thailand Mono Vampire (5-3).
Kagaya sa una nilang laban, hindi naging madali para sa Alab Pilipinas ang ikalawang pagtatagpo na umabot sa walong lead changes at limang deadlocks bago tuluyang nakuha nina imports Justine Brownlee at Renaldo Balkman ang laro sa 11-2 run sa overtime period.
Inaasahan ding bibigyan ng halaga ni Alapag ang rebounding advantage ng Slingers na naka-sentro kay 7’0 Chris Charles.
Dahil sa pagbabalik ni Charles ay umani ng 52 rebounds ang Singapore, habang may 39 ang Alab Pilipinas.
Pinangunahan ni Balkman ang kanilang ikatlong sunod na panalo mula sa kanyang 26 puntos, 8 rebounds, 4 steals at 2 blocks at may 17 markers, 7 rebounds at 8 assists naman si Brownlee.
Matapos ang Slingers ay lalabanan ng Alab Pilipinas ang Thailand Mono Vampire sa Linggo sa Stadium 29, sa Bangkok, Thailand.
- Latest