La Salle sasagupa sa UST sa paghataw ng UAAP volleyball season sa Feb. 3
MANILA, Philippines — Muling masisilayan ang mga matitikas na collegiate vollleyball stars sa paglarga ng UAAP Season 80 women’s volleyball tournament sa Pebrero 3 sa Mall of Asia Arena sa Pasay City.
Sisimulan ng De La Salle University ang pagdedepensa sa titulo sa pakikipagtipan sa University of Santo Tomas sa alas-4 ng hapon, habang lalarga naman ang bakbakan ng paboritong National University at Adamson University sa alas-2.
Ito ang unang pagkakataon na sasabak ang Lady Spikers na wala si top setter Kim Fajardo, natapos na ang five-year playing eligibility.
Ngunit matikas pa rin ang lineup ng La Salle dahil karamihan sa mga miyembro ng tropa ay naglaro para sa F2 Logistics na nagreyna sa Grand Prix ng Philippine Superliga.
Nangunguna sa listahan si reigning MVP Majoy Baron na itinanghal na Best Middle Blocker sa naturang liga.
Makakasama ni Baron sina Season 78 Finals MVP Kim KIana Dy, Season 79 Finals MVP Desiree Cheng, open spiker Tin Tiamzon, middle hitter Aduke Ogunsanya at dating PSL MVP Dawn Macandili.
Lalaban naman ang Tigresses na wala sina top spiker EJ Laure at middle hitter Ria Meneses na may magkaibang rason ng pagliban sa taong ito.
Nagpapagaling si Laure sa kanyang shoulder injury at nagpasya si Meneses na huwag nang gamitin ang kanyang final playing eligibility.
Dahil dito, sasandalan ng UST sina power-hitting Cherry Ann Rondina at opposite spiker Dimdim Pacres kasama sina Carla Sandoval, Christine Francisco, Alina Bicar at team captain Shannen Palec.
Sa kabilang banda, paborito ring makapasok sa UAAP Finals ang NU Lady Bulldogs na isa sa may pinakasolidong lineup sa taong ito.
- Latest
