Biado sibak na

MANILA, Philippines — Lumasap ng dalawang kabiguan si world champion Carlo Biado upang tuluyang mamaalam sa kontensiyon sa 2018 World Chinese 8-Ball Masters na ginaganap sa Olympic Stadium sa Qinhuangdao City, China.

Unang lumasap ang reigning World 9-Ball Cham­pionship titlist ng kabiguan sa kamay ni Wu Zhengyu ng China sa kanyang unang pagsalang matapos lasapin ang 4-13 desisyon.

Sinundan ito ng 8-13 pagyuko laban naman kay Jason Theron ng South Africa para maagang masibak sa natu­rang torneo na nagpatupad ng double-elimination format.

Si Biado ang ikatlong Pinoy na natanggal matapos mabigong makapasok sa main draw sina World 9-Ball runner-up Roland Garcia at Eric Enriquez Bayhon sa qualifying round.

Sunod na aarangkada ang Pinoy cue masters sa 2018 Derby City Classic na gaganapin sa Enero 19-27 sa Horseshoe Southern Indiana sa Elizabeth, Indiana sa Amerika.

Ipagtatanggol ni dating world champion Dennis Orcollo ang kanyang korona sa Derby City Classic 9-Ball Division at Derby City Classic Master of the Table.

Makakasama nito sina 2004 World 9-Ball Cham­pionship winner Alex Pagulayan, Roberto Gomez, Lee Vann Corteza at dating World 9-Ball at World 8-Ball titlist Ronnie Alcano.

Apat na events ang lalaruin sa Derby City Classic- ito’y ang 9-Ball, One-Pocket, 9-Ball Banks at Bigfoot 10-Ball Challenge.

Ang manlalarong may pinakamataas na puntos matapos ang apat na events ang siyang tatanghaling Master of the Table.

Si Francisco ‘Django’ Bustamante ang reigning champion sa Derby City Classic 9-Ball Banks.

Unang lalaruin ang 9-Ball Banks sa Enero 19 kasunod ang One-Pocket sa Enero 21 at ang Bigfoot 10-Ball Challenge sa Enero 22. Ang main 9-Ball event ay tatakbo mula Enero 24 hanggang 27.