Lady Chiefs, Lady Altas humataw ng panalo
MANILA, Philippines — Mabilis na pinataob ng nagdedepensang Arellano University ang Emilio Aguinaldo College, 25-19, 25-12, 25-11, upang masolo ang liderato sa NCAA Season 93 women’s volleyball tournament kahapon sa The Arena sa San Juan City.
Humataw nang husto si Necole Ebuen nang maglatag ng 15 points tampok ang 12 attacks, habang umariba rin si Jovielyn Prado na kumana ng 12 hits para hatakin ang Lady Chiefs sa kanilang ikalawang sunod na panalo.
Nauna nang iginupo ng Arellano ang Mapua Lady Cardinals, 25-10, 25-17, 25-13, noong Huwebes.
“Maiksi lang ang tournament kaya kailangan naming makakuha ng maraming panalo. No room for errors dahil every game counts,” sambit ni Arellano head coach Obet Javier.
Nagdagdag naman sina middle hitter Andrea Marzan at open spiker Regine Arocha ng tig-anim na puntos, habang muling nagpamalas ng husay si rookie setter Sarah Verutiao na naglista ng 32 excellent sets.
Wala namang nagtala ng double figures para sa Lady Generals kung saan tanging walong puntos lamang ang naitala ni Aira Binondo.
Wala pa ring panalo ang EAC sa dalawang pagsalang.
Matikas naman ang naging simula ng University of Perpetual Help System Dalta nang ilampaso ang Lyceum of the Philippines, 25-21, 25-17, 25-22.
Ipinaramdam ni middle blocker Lourdes Clemente ang kanyang husay matapos magbaon ng 14 puntos, habang nakatuwang niya sina Cindy Imbo at Bianca Tripoli na nagtala ng pinagsamang 23 puntos para sa Lady Altas.
Hindi naman nakapaglaro si Jhona Rosal na natuklasang may ovarian cyst, ngunit naging epektibo naman ang kapalit na si Jowie Albert Verzosa na nagsumite ng pitong puntos.
“It was unfortunate that it happened and we hope she (Rosal) responds well to treatment and hopefully she can still play this season,” wika ni Perpetual Help mentor Macky Cariño na siyang humalili kay Perpetual Help athletic director Sammy Acaylar.
Sa juniors’ division, sinimulan ng Perpetual Help ang pagdepensa sa titulo sa pamamagitan ng 25-18, 25-20, 25-13 panalo laban sa Lyceum.
Namayani rin ang Altas sa Knights sa iskor na 25-19, 25-13, 25-18 sa men’s side.
- Latest