Arum kumpiyansang mapapabagsak ni Ancajas si Gonzalez sa US debut

MANILA, Philippines — Nang kunin ni Manny Pacquiao si Jerwin Ancajas para sa kanyang MP Promotions ay alam niyang malayo ang mararating ng tubong Panabo City, Davao del Norte.

“Jerwin Ancajas, the IBF junior bantamweight world champion and MP Promotions’ first world title holder, is an exciting fighter who has not reached his full potential,” sabi ni Pacquiao sa isang news release ng Top Rank Promotions.

Inaasahang mas maipapakita ng 25-anyos na si Ancajas ang kanyang talento sa ibabaw ng bo­xing ring sa US debut niya sa Pebrero 3 katapat si Mexican challenger Israel Gonzalez sa American Bank Center sa Corpus Christi, Texas.

Itataya ni Ancajas ang kanyang suot na International Boxing Federation super flyweight crown sa ikaapat na sunod na pagkakataon matapos ang matagumpay na pagdedepensa noong nakaraang taon.

Nanggaling si Ancajas sa six-round KO victory laban kay Irish Jamie Conlan noong Nobyembre sa Belfast, Ireland.

Nauna na niyang tinalo sina Jose Alfredo Rodriguez sa Macau at Teiru Kinoshita sa Brisbane, Australia kung saan natalo si Pacquiao kay Jeff Horn noong Hulyo 2.

Dahil sa pareho nilang fighting style ng Filipino world eigt-division ay ikinunsidera ni Bob Arum ng Top Rank Promotions si Ancajas (28-1-1, 19 KOs) bilang “the next Pacquiao”.

“I have had the opportunity to be ringside for Jerwin’s fights in Australia and in Macau and I see a lot of similarities to his co-promoter Manny Pacquiao,” wika ng veteran promoter.

Kumpiyansa si  Arum na mapapabagsak ni Anca­jas si Gonzalez.