Harden bumida sa ika-13 sunod na panalo ng Rockets
HOUSTON — May sumasakit na tuhod, sinabi ni James Harden na muntik na siyang hindi maglaro.
Nang sabihin ng kanilang team doctors na mas lalong sasakit ang kanyang tuhod, ngunit maaari naman niya itong tiisin, sinabi niya na “Let’s go.”
Humataw si Harden ng 31 points at nagdagdag si guard Chris Paul ng 25 markers para tulungan ang Rockets sa 115-111 panalo laban sa Milwaukee Bucks.
“Mentally, this was a big win for us,” ani Paul. “We never let go of the rope. Every time they made a little push, we stayed right there down the stretch. James was out there, basically, on one leg. The mental toughness we showed as a team is what we take from this game.”
Ito ang ika-13 sunod na arangkada ng Houston na kanilang pinakamahaba matapos ang franchise-best na 22-game winning streak noong 2007-08.
Nagsalpak si Harden ng isang step-back three-pointer laban sa depensa ni Malcolm Brogdon at nakakuha ng foul para sa 11-point lead ng Rockets sa huling anim na minuto sa fourth period.
Sa huling dalawang minuto ay kumonekta naman si Paul ng back-to-back mid-range jumpers para tuluyan nang talunin ang Milwaukee.
Naglista si Giannis Antetokounmpo ng 28 points, 9 rebounds, 5 assists at 4 steals para sa Bucks.
Sa Cleveland, kumolekta si LeBron James ng 29 points, 11 rebounds at 10 assists para sa kanyang ika- 60 career triple-double at ihatid ang Cleveland sa 109-100 panalo laban sa Utah Jazz.
Ito ang pang-limang triple-double ni James ngayong season at ikatlo sa kanilang huling apat na laro para lampasan si Larry Bird sa puwesto sa No. 6 sa career list.
Sa Memphis, umiskor si Kyrie Irving ng 20 points, habang nagdagdag si Jayson Tatum ng 19 points at 9 rebounds para ibigay sa Boston Celtics ang 102-93 panalo laban sa bumubulusok na Grizzlies.
- Latest