McGregor magbabalik sa UFC; Hindi na lalabanan si Pacquiao
MANILA, Philippines — Ang pagsagupa kay Floyd Mayweather, Jr. noong Agosto ang huling pagkakataon na makikita si Conor McGregor sa isang boxing fight.
Sinabi ni McGregor, ang Ultimate Fighting Championship lightweight king, sa panayam ng TMZ sa New York City na muli siyang lalaban sa loob ng Octagon sa UFC.
“I think a true fight is what I want to do next,” wika ni McGregor sa video na ipinoste online kahapon. “MMA next.”
Ang pahayag ni McGregor ang inaasahang magpapatahimik kay Manny Pacquiao na nauna nang nagparamdam sa Irish fighter.
Plano ng 39-anyos na si Pacquiao na labanan ang 29-anyos na si McGregor sa ibabaw ng boxing ring sa Abril ng 2018.
Ayon naman kay UFC president Dana White, muling makikita sa aksyon sa UFC si McGregor matapos ang kanyang boxing debut noong Agosto laban kay Mayweather.
“He’s not boxing anyone so calm down cry babies,” sabi ni White kay McGregor, huling lumaban noong Nobyembre ng 2016 nang kunin ang UFC lightweight title mula sa kanyang second-round TKO victory kay Eddie Alvarez.
Sa kanyang unang boxing fight laban sa 41-anyos na si Mayweather, kumolekta ng higit sa $300 milyon, ay nagbulsa si McGregor ng $100 milyon.
Plano ni White na itapat si McGregor kay UFC lightweight interim titlist Tony Ferguson sa susunod na taon.
“Tony is the interim champion, Conor is the champion, it’s the fight that makes sense. It’s the fight that has to happen,” sabi ni White. “It doesn’t make sense, it’s the fight that has to happen.”
Nagmula naman si Pacquiao sa isang unanimous decision loss kay Jeff Horn kung saan niya naisuko ang hawak na World Boxing Organization welterweight crown noong Hulyo 2 sa Brisbane, Australia.
Wala pang pahayag si Pacquiao kung sino ang kanyang lalabanan sa 2018.
- Latest