Dula, Lobos nanguna sa mga gumiba ng record sa PSL Lucena swim meet
LUCENA CITY, Philippines — Pinangunahan nina record-breaker Marc Bryan Dula at Jordan Ken Lobos ang mga gold medalists sa pagsisimula ng 127th Philippine Swimming League (PSL) National Series – Long Course Swimming Meet na ginaganap sa Alcala Sports Complex Swimming Pool dito.
Inilatag ng Wisenheimer Academy standout na si Dula ang kanyang husay nang wasakin ang rekord sa boys’ 10-year 50m backstroke sa tiyempong 35.80 segundo na siyang tumabon sa kanya ring rekord na 36.05.
Tinalo ni Dula sina Shan Kervie Medina na may 44.19 segundo at Reinielle Trinidad na naglista ng 44.50 segundo na nagkasya sa pilak at tanso, ayon sa pagkakasunod.
Nagparamdam din ng lakas si Lobos matapos mamayagpag sa boys’ 14-year 50m backstroke sa bilis na 31.47 segundo para ungusan sina silver medalist Lance Lotino (34.56) at bronze winner Christ Andal (35.81).
Nakasiguro rin ng gintong medalya sina Diliman Preparatory School bets Lee Grant Cabral (boys’ 11-year 50m backstroke, 38.53), Ehm Alavy-Chafi (girls’ 9-year 50m backstroke, 44.72), Paula Carmela Cusing (girls’ 14-year 50m butterfly) at John Salinel (boys’ 9-year 50m butterfly, 44.93).
Nakaginto rin sina Mervier Mirandilla (boys’ 15-over 200m freestyle, 2:09.63), John Rala (boys’ 13-year 200m freestyle, 2:36.53), Yohan Cabana (boys’ 12-year 200m freestyle, 2:19.50), Hannah Halamani (girls’ 6-under 50m breaststroke, 1:44.68) at Heleina Glorioso (girls’ 8-year 50m breaststroke, 1:07.87).
Ang iba pang gold medalists ay sina Gavin Guino, Lawrence Arabes, Agustin Mendoza, Ayeles Mirandilla, Angela Babiera, Althea Villapena, Christine De Luna, Marion Del Moro, John Paredes, Arianne Zarsuelo, Katherine Azores, Lia Babiera, Poleen Corpuz, Jasmine Del Moro at Charlize Cabana.
“It’s overwhelming to see these kids break records from time to time. It shows that they are improving so fast and we’re happy to see them grow. Some of them will be sent to international competitions next year,” wika ni PSL President Susan Papa.
- Latest