Thompson, Durant binitbit ang Warriors sa ika-8 dikit
Dinipensahan ni Wesley Matthews ng Mavericks si Klay Thompson ng Warriors.
OAKLAND, California — Wala ang apat nilang players, pumagitna si Klay Thompson sa fourth quarter para tulungan ang Golden State Warriors na talunin ang Dallas Mavericks, 112-97.
Hindi naglaro sina Stephen Curry, Draymond Green, Zaza Pachulia at Nick Young para sa Warriors, nahulog sa eight-point deficit sa first half bago kumamada si Kevin Durant sa third quarter para sa kanilang seven-point lead laban sa Mavericks.
Umiskor naman si Thompson ng 12 points sa inihulog na 14-4 bomba ng Golden State, dumiretso sa kanilang pang-walong sunod na panalo, para ilista ang 100-83 kalamangan laban sa Dallas sa gitna ng fourth period.
Pinamunuan ni Durant ang Warriors mula sa kanyang game-high 36 points habang nagdagdag si Thompson ng 25 markers kasama ang 5-of-5 shooting sa three-point line.
Naglista si Omri Casspi ng 17 points at 10 rebounds.
Bumandera si Dirk Nowitzki para sa Mavericks (8-21) sa kanyang iniskor na 18 points kasunod ang 16 at 13 markers nina Harrison Barnes at JJ Barea, ayon sa pagkakasunod.
Sa Cleveland, nilampasan ng Cavaliers ang matinding hamon ng Los Angeles Lakers nang kunin ang 121-112 panalo.
Tumipa si Kevin Love ng 28 points para sa Cavaliers (21-8) habang itinala ni LeBron James ang kanyang ika-59 career triple-double sa tinapos na 25 markers, 12 assists at 12 rebounds.
Humataw naman si Brandon Ingram ng 26 points sa panig ng Lakers (10-17) kasunod ang 20 markers ni Kyle Kuzma, habang nagposte si rookie Lonzo Ball ng 13 points, 11 assists at 8 rebounds.
- Latest
