Paul kumana ng 31 points para sa panalo ng Rockets laban sa Hornets
HOUSTON — Nagpasabog si point guard Chris Paul ng season-high na 31 points, habang nagdagdag si James Harden ng 21 markers para pamunuan ang Rockets sa 108-96 paggupo sa Charlotte Hornets.
Dumiretso ang Houston sa kanilang NBA-best winning streak sa 11.
Naipanalo ng Rockets ang 17 sa kanilang huling 18 laro para itaas ang kanilang record sa 22-4, ang best record ngayon sa liga.
Kumamada ang Houston ng 25 sunod na puntos sa first quarter at sa pagsisimula ng second period para makalayo sa Charlotte sa 49-23.
At sapat na ito para tuluyan nang igupo ng Rockets ang Hornets.
Dinuplika ni star center Dwight Howard ang kanyang season high na 26 points bukod pa sa hinablot na 18 rebounds at 3 blocks para sa Charlotte.
Naisuko ng Hornets ang siyam sa kanilang huling 10 laban sapul noong Oktubre 10.
Nagsalpak ang Houston ng 17 three-pointers.
Sa Miami, humugot si Damian Lillard ng pito sa kanyang 18 points sa huling 3:16 minuto ng fourth period at nakabangon ang Portland Trail Blazers mula sa 16-point second-half deficit para talunin ang Heat, 102-95.
Tinapos ng Trail Blazers ang kanilang five-game losing slump.
Ang three-point play ni Lillard ang nagbigay sa Portland ng 98-95 abante kasunod ang kanyang dalawang free throws para sa kanilang five-point lead sa Miami.
Umiskor si CJ McCollum ng 28 points para sa Trail Blazers (14-13).
Sa Indianapolis, ginawa ni Paul George ang kanyang winning return sa Indiana.
Nagsalpak si George ng dalawang free throws sa natitirang 10.7 segundo para tulungan ang Oklahoma City Thunder sa 100-95 panalo laban sa Pacers.
Tumapos ang four-time All-Star forward na may 12 points mula sa 3-of-14 fieldgoal shooting bukod pa ang 2 rebounds at 4 turnovers para sa Oklahoma City.
Kumolekta naman si center Steven Adams ng 23 points at 13 rebounds para sa Thunder, habang naglista si guard Russell Westbrook ng 10 points, 17 rebounds at 12 assists para sa kanyang pang-siyam na triple-double ngayong season.
Pinamunuan naman ni guard Victor Oladipo ang Pacers mula sa kanyang 19 points.
Nag-ambag ng 15 mar-kers si Bojan Bogdanovic para sa Indiana.
- Latest