SBP hihigitan ang gagawin ng China para sa 2023 World Cup
MANILA, Philippines — Magpapadala ang Samahang Basketbol ng Pilipinas (SBP) ng isang grupo sa China para mag-obserba sa paghahandang isinasagawa ng China gayundin sa aktuwal na hosting sa 2019 FIBA World Cup.
Gusto ni SBP president Al Panlilio na makakuha ng ideya ang Pilipinas mula sa China na maaaring magamit upang mas lalong maging matagumpay ang pagtatayugod ng bansa sa 2023 FIBA World Cup.
“We will form a team to learn what's happening in China regarding their preparations for the 2019 FIBA World Cup. We want send a team to learn from the good things and mistakes they're doing that we can apply to us here when we host the 2023 edition,” pahayag ni Panlilio.
Matapos maipanalo ang bidding ay sisimulan na ng SBP ang preparasyon para matiyak na nasa ayos ang lahat bago dumating ang mga delegado mula sa iba't ibang bansa.
Sa 32 koponang lalaban sa 2023 FIBA World Cup, kalahati rito ay maglalaro sa Pilipinas, habang ang natitirang 16 teams ay hahatiin sa Japan at Indonesia na siyang magiging katuwang ng Pilipinas sa hosting.
Maraming bagay ang dapat tutukan ng SBP kagaya ng billeting ng mga players at officials gayundin ang transportasyon mula sa hotel patungong venue.
Isa ito sa mga tinukoy ng FIBA na kailangang pagtuunan ng pansin ng bansa.
Tiniyak naman ni Department of Foreign Affairs Secretary Alan Peter Cayetano na suportado ng pamahalaan ang paghahanda ng SBP sa 2023 World Cup.
Iba na ang administrasyon sa oras na ganapin ang 2023 World Cup sa Pilipinas subalit alam ni Cayetano na magbubuhos rin ng suporta ang susunod na mamumuno sa bansa dahil ang hosting na ito ay para rin sa kapakanan ng Pilipinas.
"This administration and the next (administration) will honor because it's for the country naman. Magiging kapaki-pakinabang ito sa bansa. Bakit ba nagho-host ang mga bansa ng malalaking events like World Cup, Olympics? Dahil magandang exposure ito para mai-promote ang bansa,” ani Cayetano.
- Latest
