...Narvasa ‘di pa tiyak ang kapalaran
MANILA, Philippines — Bago pa man simulan ang paglulunsad sa 43rd Season ng PBA kahapon sa Okada Manila sa Parañaque City ay inihayag na ni Communications and External Affair Director Willie Marcial na bawal pag-usapan ang isyu kay PBA Commissioner Chito Narvasa.
“Itong press conference ay para sa PBA opening at hindi po natin pag-uusapan ang PBA impasse,” sabi ni Marcial.
Tradisyunal nang nauupo ang mga miyembro ng PBA Board of Governors sa tinatawag na Presidential table kasama ang PBA Commissioner.
Ngunit nanatiling bakante ang Presidential table hanggang matapos ang press conference habang nakahiwalay naman ng lamesa si Narvasa.
Sinabi ni outgoing PBA chairman Mikee Romero na siya ang umaayos sa gusot sa pagitan ng majority bloc, binubuo ng TNT Katropa, Meralco, NLEX, Rain or Shine, Alaska, Phoenix at Blackwater at minority group, kinabibilangan ng San Miguel, Barangay Ginebra, Magnolia, Globalport at Kia.
“Hindi natin ine-extend 'yung Martial Law dito. I'm happy that all PBA Governors are all well-represented today,” wika ni Romero, ang team owner ng Globalport. “I think we are a solid group as of this time.”
Dahil sa pagpayag ni Narvasa na matuloy ang trade sa pagitan ng San Miguel at Kia na kinasasangkutan ni Fil-German Christian Standhardinger ay inendorso ng majority bloc na huwag nang bigyan ng panibagong termino si Narvasa bilang PBA Commissioner.
Hindi naman ito kinatigan ng minority group.
Wala pang opisyal na pahayag ang PBA Board kung tuluyan nang hahanapan ng kapalit si Narvasa o bibigyang muli ng bagong kontrata.
Wala pang inilalabas na buong iskedyul ang PBA para sa 2018 Philippine Cup na magsisimula sa Linggo at maging ang preparasyon para sa opening ceremonies sa Smart Araneta Coliseum.
- Latest