Mavericks diniskaril ang pagbabalik ni Leonard

DALLAS - Kabiguan kaagad ang ibinigay ng Mavericks para sa season debut ng nagbabalik sa aksyong si Kawhi Leonard ng San Antonio Spurs.

Umiskor si point guard J.J. Barea ng 14 sa kanyang 16 points sa second half para tulungan ang Mavericks sa 95-89 panalo laban sa Spurs.

Hindi nakita sa aksyon si Leonard sa unang 27 games dahil sa right quadriceps tendinopathy, isang kondisyon kung saan sumasakit at humihina ang tuhod.

Naglista si Leonard ng 13 points, 6 rebounds, 1 assist at 1 block bago dumiretso sa locker room sa dulo ng third quarter at hindi na pinaglaro sa fourth period.

Umiskor naman si Harrison Barnes ng 17 points, habang nag-ambag sina Yogi Ferrell at Wesley Mathews ng tig-16 mar­kers para tapusin ng Mavericks ang kanilang five-game losing slump.

Ang kabiguan ang tumapos sa four-game winning streak ng San Antonio.

Humakot si LaMarcus Aldridge ng 23 points at 13 rebounds kasunod ang 21 markers ni Rudy Gay para sa Spurs.

Sa Cleveland, kumolek­ta si LeBron James ng 25 points at dinuplika ang career-high na 17 assists para pamunuan ang 123-114 panalo ng Cavaliers laban sa Atlanta Hawks.

Ito ang ika-15 panalo ng Cavs sa huling 16 games.

Binigyan si James, humakot pa ng 7 rebounds, ng standing ovation matapos ipahinga sa huling 2:34 minuto ng fourth quarter.

Sa pamumuno ng four-time MVP ay nagsalpak ang Cavaliers ng season-high 20 triples, kasama ang siyam sa first quarter.

Sa Minnesota, inagaw ng Philadelphia 76ers ang isang 118-112 overtime win kontra sa Timberwolves.

Kumonekta si Joel Embiid ng dalawang free throws sa huling 14 segundo sa regulation na nagdala sa 76ers sa extra period.

Nagtala si Embiid ng 28 points, 12 rebounds at 8 assists para sa 76ers.