Bronze kay Watanabe
Si Kiyomi Watanabe (black) sa isa niyang laban.
MANILA, Philippines — Humirit ng tansong medalya si three-time Southeast Asian Games champion Kiyomi Watanabe sa 2017 Asian Open Judo Championships na ginanap sa Tin Shui Wai Sports Center sa Causeway Bay, Hong Kong.
Umusad sa semifinals ang 21-anyos na si Watanabe matapos gapiin si Cheung Wing Laam ng Hong Kong sa quarterfinals ng women’s 63 kgs. division sa Pool A. Nakahirit ito ng opening-round bye dahil sa kanyang top seeding.
Subalit hindi pinalad si Watanabe sa semis nang matalo ito kay Futuba Suzuki ng Japan dahilan upang mahulog sa battle-for-bronze match.
Tinalo ni Watanabe sa bronze-medal bout si Maeve Coughlan ng Australia para masiguro ang podium finish.
Ito ang ikaapat na medalya ni Watanabe sa taong ito.
Nakahirit ng ginto si Watanabe sa Asian Open Women's Judo Championship sa Taiwan noong Hulyo, pilak sa European Open Women's Judo Championship sa Austria noong Pebrero, tanso sa 2017 World Judo Tour - Paris Grand Slam sa France noong Pebrero.
Ibinulsa naman ni Watanabe ang ginto sa SEA Games sa Kuala Lumpur, Malaysia noong Agosto.
“Her bronze-medal finish is already a big boost to improve her ranking in the International Judo Federation. She needs more points to qualify to the 2020 Tokyo Olympics and we’re happy that the Philippine Sports Commission is supporting her bid to qualify to the Olympics,” wika ni Irene Watanabe, ang ina ni Kiyomi na siyang tumatayong mentor ng Filipino-Japanese judoka.
Hindi naman pinalad na makahirit ng medalya ang isa pang pambato ng Pilipinas sa naturang dibisyon na si Jenielou Mosqueda na yumuko kay Baasanjarga Bayarbat ng Mongolia sa Pool D.
Bigo ring makapasok sa podium sina Filipino-Japanese Megumi Kurayoshi (women’s 57 kgs.), Al Rolan Llamas at Sean Levyn Panganiban (men’s 60 kgs.), Shugen Nakano (men’s 66 kgs.), Keisei Nakano (men’s 73 kgs.) at Kohei Kohagura (men’s 81 kgs.).
Sunod na sasabak si Watanabe sa 2017 Masters St. Petersburg sa St. Petersburg, Russia na gaganapin sa Disyembre 16 hanggang 17.
Tanging si Watanabe lamang ang ilalaban ng Pilipinas dahil ito lang ang may pinakamataas na puwesto sa world ranking kung saan kasalukuyan itong nasa ika-22 posisyon.
- Latest
