Mojdeh wagi ng MBS sa Dubai meet

MANILA, Philippines — Itinanghal si Philippine Swimming League (PSL) standout Micaela Jasmine Mojdeh bilang Most Bemedalled Swimmer sa 2017 Hamilton Aqua­tics Winter Long Course Swimming Championship na ginanap sa Hamdam Sports Complex sa Dubai, United Arab Emirates.

Ito ay matapos makumpleto ng Immaculate Heart of Mary College-Parañaque tanker ang matamis na sweep sa lahat ng kanyang 12 events sa girls’ 11-year category kung saan inilampaso nito ang mas matatangkad at mas matatandang karibal.

Nakasungkit si Mojdeh ng gintong medalya sa 50m freestyle (31.01), 100m breaststroke (1:23.33), 400m Individual Medley (5:30.75), 200m freestyle (2:25.50), 100m butterfly (1:08.72) at 200m breaststroke (2:57.19) sa opening day.

Matikas itong sinundan ni Mojdeh ng anim pang gintong medalya sa ikalawang araw ng kumpetisyon matapos mama­yagpag sa 200m Individual Medley (2:39.96), 50m butterfly (31.28), 400m freestyle (5:01.31), 50m breaststroke (37.60), 100m freestyle (1:07.71) at 200m butterfly (2:34.27).

“I am a fan of Jasmine Mojdeh. She’s an amazing swimmer with amazing times. Our future Olympian and hopefully win our first-ever gold medal in the Olympics. We’re so proud of her achievement,” ani PSL President Susan Papa.

Sa kabuuan, humakot ang PSL ng 16 ginto, anim na pilak at limang tansong medalya.

Nakahirit naman si reigning Male Swimmer of the Year Marc Bryan Dula ng Wisenheimer Academy ng isang ginto, apat na pilak at isang tansong medalya.

Pinagharian ni Dula ang boys’ 11-year 200m butterfly sa bisa ng 3:03.18 habang nakapilak ito sa 50m butterfly (32.43), 400m freestyle (5:24.91), 400m IM (6:08.78) at 100m butterfly (1:16.85), at tanso sa 100m backstroke (1:19.96).

Nagdagdag naman ng dalawang ginto si Angela Torrico sa girls’ 11-year 50m backstroke (36.09) at 100m backstroke (1:20.72) habang may isang ginto si Albren Dayapdapan sa boys’ 200m breaststroke (2:48.98).