Pinay lifters kumana uli ng 4 ginto
MANILA, Philippines — Humirit pa ang national powerlifting team ng apat na gintong medalya sa 2017 Asian Classic Powerlifting Championship na ginaganap sa Ramada Hotel activity hall sa Alappuzha, Kerala sa India.
Nagparamdam din ng puwersa si Daisy Grace Lipasana matapos umani ng dalawang gintong medalya sa women’s 57 kgs. sub-junior category habang kumana rin ng dalawang ginto si world record holder Anita Koykka sa women’s 52 kgs. open division.
Maliban sa dalawang ginto, may limang pilak at tatlong tanso pang nakuha ang Pinay lifters.
Nakadalawang pilak si Lipasana habang may tatlong pilak naman si Jessa Mae Tabuan sa women’s 43 kgs. sub-junior event. Galing naman ang mga tanso kina Koykka at Rowella Abrea (women’s 52 kgs. sub-junior).
Sa kabuuan, mayroon nang 12 ginto, anim pilak at tatlong tanso ang Pilipinas sa torneong inorganisa ng Asian Powerlifting Federation (APF) at International Powerlifting Federation (IPF).
Nauna nang nakahirit ng gintong medalya sina Tacloban City standout Veronica Ompod sa women’s sub-junior under-43 kg. division kung saan nagbulsa ito ng tatlong ginto tampok ang dalawang bagong world record sa deadlift (120 kgs.) at total (365 kgs.), ang isang pilak na medalya sa bench press.
Wagi naman ng apat na ginto si Leslie Evangelista sa women’s 47 kg. open at isa galing kay Tabuan sa women’s 43 kgs.
- Latest