Lakers kinaldag ang Hornets
CHARLOTTE, N.C. - Humugot si Fil-American guard Jordan Clarkson ng 14 sa kanyang 22 points sa fourth quarter para tulungan ang Los Angeles Lakers na talunin ang Hornets, 110-99.
Nagdagdag si Brandon Ingram ng 18 points kasunod ang 15 markers ni Kentavious Caldwell-Pope para sa Lakers, sumasakay sa two-game winning run matapos mahulog sa limang sunod na kamalasan.
Sa sobrang init ni Clarkson, ibinabad siya ni coach Luke Walton sa kabuuan ng fourth quarter habang iniupo naman si rookie sensation Lonzo Ball sa bench.
Tumapos si Ball na may 5 points at 9 assists matapos maglista ng 10 points, 8 rebounds, 8 assists, 3 steals at 4 blocks sa nakaraang 107-104 panalo ng Lakers laban sa Philadelphia 76ers.
Umiskor naman si Kemba Walker ng 23 points habang humakot si Dwight Howard ng 21 points at 12 rebounds sa panig ng Hornets, naipatalo ang pito sa huli nilang walong laro.
Wala sa bench ng Charlotte ang kanilang tatlong key reserves na sina Cody Zeller (meniscus tear in knee), Frank Kaminsky (sprained ankle) at Jeremy Lamb (bruised shin).
Ang dunk ni Clarkson, three-point shot ni Caldwell-Pope at layup ni Julius Randle ang nagbigay sa Lakers ng 15-point lead sa gitna ng fourth period.
Sa Cleveland, itinala ni LeBron James ang kanyang ika-58 career triple-double at nakabangon ang Cavaliers sa fourth quarter para balikan ang Philadelphia 76ers, 105-98.
Nagposte si James ng 30 points, 13 rebounds at 13 assists para ibangon ang Cleveland mula sa naunang kabiguan sa Indiana noong Biyernes na tumapos sa kanilang 13-game winning streak.
Sa Milwaukee, kumamada si Giannis Antetokounmpo ng 37 points, 13 rebounds at 7 assists para pangunahan ang Bucks sa 117-100 paggupo sa Utah Jazz at ilista ang kanilang ikatlong sunod na panalo.
- Latest
