Junior Blazers kampeon
MANILA, Philippines — Ginulantang ng College of Saint Benilde-La Salle Greenhills ang Mapua University sa bisa ng 75-74 desisyon sa rubber match upang pagharian ang NCAA Season 93 juniors basketball tournament kahapon sa The Arena sa San Juan City.
Humataw ng husto si Joshua David nang bumanat ito ng 27 puntos mula sa 12-of-18 shooting clip kasama pa ang anim na rebounds, dalawang assists at isang steal para tulungan ang Junior Blazers na makuha ang kanilang kauna-unahang titulo.
Nakatuwang ni Davis si Joel Cagulangan na kumana naman ng 19 markers, siyam na boards pitong assist at apat na steals habang nagdagdag ng pinagsamang 14 puntos sina Jacob Lao at Inand Fornillos.
Napasakamay ni Cagulangan ang Finals MVP matapos magrehistro ng averages na 17.3 points, 6.7 rebounds, 7.0 assists at 3.3 steals sa finals series.
Tinapos ng Junior Blazers ang best-of-three series sa 2-1.
Nakauna ang La Salle Greenhills nang kunin nito ang Game 1 sa pamamagitan ng 74-68 desisyon bago nakabawi ang Mapua sa Game 2 sa iskor na 91-81.
Nasayang ang pinaghirapang 21 puntos ni Clint Escamis gayundin ang 12 ni Carl Lacap, 12 ni Season MVP Will Gozum at 10 ni Warren Bonifacio.
Nakumpleto ng Junior Blazers ang kanilang Cinderella run kung saan kinailangan pa nitong dumaan sa playoff para makuha ang huling tiket sa Final Four.
- Latest