Juniors crown pag-aagawan ng Mapua at LSGH
MANILA, Philippines — Asahan ang matinding bakbakan sa pagitan ng Mapua at College of St. Benilde-La Salle Greenhills sa paglarga ng ‘winner-take-all’ game ng kanilang NCAA Season 93 juniors basketball championship series sa The Arena sa San Juan City.
Nakatakda ang ‘rubber match’ ng Red Robins at Junior Blazers sa alas-3 ng hapon.
Nauwi sa Game Three ang best-of-three finals kung saan namayani ang Junior Blazers sa Game One sa bendisyon ng 74-68 panalo bago maitabla ng Red Robins ang serye bunsod ng 91-81 pananaig sa Game Two.
Pumanig sa Mapua ang momentum na nais nilang madala sa importanteng laban kontra sa LSGH.
Tiwala si Red Robins head coach Randy Alcantara na mauulit ng kanyang tropa ang impresibong panalo sa Game Two.
“Of course, if we will play as hard as Game Two, maybe harder, we hope it will be us going home as champions,” ani Alcantara, nagdala sa Red Robins sa korona noong nakaraang taon matapos patumbahin ang San Beda Cubs.
Target ng Mapua ang ika-22 titulo sa liga upang saluhan ang winningest team na San Beda sa unahan ng overall standings tangan ang 22 korona.
Sasandalan ng Red Robins si Clint Escamis na nagpasabog ng 25 puntos kabilang ang 10 sa fourth quarter sa Game Two at si Warren Bonifacio na kumana ng 18 puntos.
- Latest
