Heat sinunog ang 16-game winning run ng Celtics; Westbrook at Durant nagkapormahan sa laro

MIAMI – Nagwakas na ang 16-game winning streak ng Boston.

Kumamada sina Goran Dragic at Dion Waiters ng 27 at 26 points, ayon sa pag­kakasunod, para pa­mu­nuan ang Heat sa 104-98 panalo laban sa Celtics.

“You can tell they were locked into this game,” wika ni Boston star playmaker Kyrie Irving. “They wanted it and proved it.”

Ang Heat ang kauna-unahang koponang nagpa­tumba sa Celtics sapul no­ong Oktubre 18.

Nagposte ang Miami ng 18-point lead at hinawakan ang 14-point advantage sa gitna ng fourth quarter.

Ngunit nakilala ang Bos­ton sa pagbangon mu­la sa mga double-digit deficit sa kanilang naitalang 16-game winning streak.

At muntik na naman itong magawa ng Celtics la­ban sa Heat.

Ang 13-0 bomba ang nag­dikit sa Boston sa 90-91 agwat sa huling 3:14 mi­nuto ng laro bago humataw si Waiters ng dalawang three-point shots.

“I knew I had what I wan­ted,” wika ni Waiters.

Sa Oklahoma City, kumolekta ang reigning MVP na si Russell Westbrook ng season-high na 34 points, 10 rebounds at 9 assists pa­ra tulungan ang Thunder sa 108-91 paggiba sa Gol­den State Warriors.

Nagdagdag si Carmelo Anthony ng 22 points kasunod ang 20 markers ni Paul George para sa Thunder.

Ito ang unang panalo ng Oklahoma City laban sa Golden State sapul nang iwa­nan ni Kevin Durant si Westbrook at ang Thunder pa­ra lumipat sa Warriors ma­tapos ang 2015-16 sea­son.

Sa third quarter ay kap­wa natawagan sina Westbrook at Durant ng double technical foul.

“I play the same way every night if it’s against Ke­vin or if it’s against Detroit,” ani Westbrook sa ‘thrash-talking’ kay Durant. “It don’t matter who it is. On the court I have no friends. The only friend I have is the basketball. That’s it. And ob­viously my teammates.”