Pinoy cue masters pasok sa main draw
MANILA, Philippines — Pinangunahan ni legendary cue master Efren ‘Bata’ Reyes ang pagmartsa ng 11 Pinoys sa main draw ng 2017 All Japan 10-Ball Championship na ginaganap sa Hyogo, Japan.
Dalawang sunod na panalo ang itinala ni Reyes laban kina Kanji Tokoro (9-5) at Keisuke Hanawa (9-7) sa group stage upang makahirit ng tiket sa knockout phase.
Pasok din sina Johann Chua, Jefferey Ignacio, Warren Kiamco, Jundel Mazon, Carlo Biado, Lee Vann Corteza, Raymund Faraon, Jeffrey De Luna, Mark Mendoza at Antonio Lining na nagwagi rin sa kani-kanilang grupo.
Tinalo ni Chua sina Yi King Ling (9-1) at Masahiro Shimano (9-8), nanaig si Ignacio kina Atsushi Suzuki (9-5) at Kunihiko Takahashi (9-6), namayani si Kiamco kina Sanjin Pehilvanovic (9-7) at Masato Asano (9-4), nanalo si Mazon kina Lo Ho Sum (9-2) at Riyou Komada (9-2), iginupo ni Biado sina Ryoma Miyagi (9-7) at Kenichi Uchigaki (9-5) at wagi si Corteza kina Motoki Tsukimura (9-2) at Tomoo Takano (9-6).
Hindi rin nagpahuli sina Faraon na namayani kina Kouji Miyatani (9-5) at Minh Phuc Luu (9-4), De Luna na pinatalsik sina Bahram Lotfy (9-6) at Sho Tsuken (9-0), Mendoza na pinatumba sina Toru Kuribayashi (9-6) at Ryu Seong Woo (9-6) at Lining na pinabagsak sina Masayuki Kitagawa (9-4) at Masato Yoshioka (9-2).
Makakatipan ni Reyes sa main draw si Hiroshi Takenaka ng Japan habang sasagupain ni Chua si Hsieh Chia-Chen ng Chinese-Taipei, lalarga si Ignacio kay Shosuke Hamada ng Japan, haharapin ni Kiamco si Yukio Akagariyama ng Japan at aarangkada si Mazon kontra kay Katsuji Teruya ng Japan.
Nakatakda rin ang bakbakan nina Biado at Sou Oonishi ng Japan.
- Latest
