Lifesavers nagpalakas
MANILA, Philippines — Umiskor ng 22 puntos ang Croatian import na si Katarina Pilepic para iangat ang Generika-Ayala sa straight sets panalo laban sa University of Santo Tomas-Victoria Sports, 25-16, 25-19, 25-23 kahapon sa pagpapatuloy ng 2017 Chooks to Go-Philippine Superliga (PSL) Grand Prix sa FilOil Flying V Arena sa San Juan City.
Matapos makuha ang unang set, 25-16, tila nagpahinga ang Lifesavers sa ikatlong set na nagdala sa kanila sa panganib at buti na lang naging maagap sina Pilepic at Darlene Ramdin ng Trinidad-Tobago para mailusot ang 25-23 panalo na umabot ng mahigit 28 minuto.
“It’s good that we won today although it was not that easy. In the third set, we committed a lot of errors that’s why, we have to work doubly hard to escape with the win. You know, to win is all about passing the ball well. But anyway, we have to keep going because in the end it would about consistency,” sabi ni Pilepic.
Umani rin si Pilepic ng 18 atake, dalawang blocks at dalawang aces para umakyat sa solo fifth spot sa 3-4 win-loss kartada sa likuran ng nangungunang F2 Logistics (5-0), Petron (5-1), Foton (5-1) at Cocolife (3-3).
Lumamang pa ang Tigresses, 18-16 sa third set bago umatake si Pilepic na nagbigay daan para sa 9-5 run at biguin ang UST sa limang sunod na laro (0-5).
Sa limang laro, isang beses pa lamang nanalo ng set ang España-based Tigresses laban sa Cocolife, 19-25, 25-16, 17-25, 20-25 noong Nobyembre 7.
Haharapin ng UST ang Iriga City (1-4) sa importanteng laban sa Sabado sa Batangas City Sports Center upang malaman kung sino sa kanila ang papasok sa 8-team quarterfinal round.
Dinomina ng Lifesavers ang lahat ng department sa laban sa 40 atake habang 30 lamang sa Tigresses bukod sa kanilang malaking bentahe sa blocking area, 6-1 at pitong aces.
- Latest