Otico, Capadocia kampeon sa PCA Open
Marian Jade Capadocia
MANILA, Philippines — Nasungkit nina Marian Jade Capadocia at John Bryan Otico ang kampeonato matapos patumbahin ang kani-kanilang karibal kahapon sa 36th Philippine Columbian Association (PCA) Open sa PCA indoor shell-clay courts sa Paco, Manila.
Hindi hinayaan ni Capadocia na makaporma si Clarice Patrimonio nang kubrahin nito ang 6-3, 6-4 panalo upang matamis na mabawi ang korona sa ladies’ singles.
Ito ang ikalimang titulo ni Capadocia sa torneo matapos pagreynahan ang 2011, 2012, 2013 at 2014 edisyon bago magpasyang ituon ang kanyang pansin sa ITF tournaments noong 2015 at 2016.
Napantayan ni Capadocia si Czarina Mae Arevalo bilang winningest player sa torneo. Namayagpag si Arevalo noong 2002, 2003, 2005, 2007 at 2009.
“Sobrang sarap ng feeling na makuha ulit yung title after two years. It’s like I’m winning my first title again. My hardwork really paid off yung pagsisikap sa training especially kahit sa abroad yung training malayo sa family,” wika ni Capadocia.
Ilang krusyal na errors ang nagawa ni Patrimonio partikular na sa second set kung saan nagtala ito ng dalawang double faults dahilan upang hablutin ni Capadocia ang 4-1 kalamangan na siyang naging matatag na pundasyon nito tungo sa kampeonato.
Tumagal ang laban ng dalawang oras.
Napasakamay ni Capadocia ang P50,000 premyo habang nagkasya lamang sa P25,000 konsolasyon si Patrimonio sa torneong suportado ng The Philippine Star, Asiatraders Dunlop, Stronghold Insurance, Whirlpool/Fujidenzo, Head, United Auctioneers, Pearl Garden Hotel, Babolat, Tyrecorp Inc., PVL Restaurant, Greenfield Marketers One, Mary Grace Foods Inc., Coca-Cola Philippines-FEMSA, Kraut Art Glass, Manuel Misa at Atty. Antonio Cablitas.
Naitarak naman ni Otico ang 6-4, 6-3, 3-6, 3-6, 6-4 panalo upang hubaran ng korona si two-time champion Patrick John Tierro sa larong tumagal ng apat na oras.
“Nilaro ko lang yung best ko dahil nothing to lose naman ako kaya yung pressure wala sa side ko. Yun siguro yung naging advantage ko dahil hindi ako pressured sa laro. Ginawa ko lang yung mga dapat gawin,” ani Otico.
Napasakamay ni Otico ang P100,000 top purse habang nagkasya si Tierro sa P50,000 konsolasyon.
- Latest
