Zoleta, De Guzman doubles champion
Ang women’s double champion na sina (Bambi Zoleta (kaliwa) at Akiko De Guzman.
MANILA, Philippines — Nagsanib-puwersa sina 2008 ladies’ singles winner Bambi Zoleta at NCAA champion Akiko De Guzman upang matamis na angkinin ang kampeonato sa ladies’ doubles kahapon sa 36th Philippine Columbian Association (PCA) Open sa PCA indoor shell-clay courts sa Paco, Manila.
Matapos ang gitgitang bakbakan sa first set, mas solidong laro ang inilabas nina Zoleta at De Guzman sa second set upang igupo sina Khryzelle Sampaton at Rachelle De Guzman, 7-6 (4), 6-1.
“It’s my first title since winning the ladies’ singles crown nine years ago. Medyo hindi maganda yung chemistry namin sa early rounds buti na lang nag-click talaga kami sa very important match (finals) namin,” wika ng 25-anyos na si Zoleta na kasalukuyang nagta-trabaho bilang receptionist sa Shangri-La Bonifacio Global City.
Sa katunayan, aksidente lang ang tambalan nina Zoleta at De Guzman.
Nais lang sanang ituon ni De Guzman ang kanyang atensiyon sa singles event habang bigla naman nag-backout ang kapares ni Zoleta dahil sa personal na rason.
“Gusto ko lang sana talagang mag-concentrate sa singles then someone approached me to play with her (Zoleta) and I grabbed it. I’m happy playing with her and winning this title,” ani De Guzman na miyembro ng College of Saint Benilde team na nagkampeon noong 2015 at 2016 sa NCAA bago lumipat sa De La Salle University ngayong taon.
Napasakamay nina Zoleta at De Guzman ang P20,000 premyo habang nagkasya naman sina Sampaton at De Guzman sa P10,000 konsolasyon sa torneong suportado ng The Philippine Star, Asiatraders Dunlop, Stronghold Insurance, Whirlpool/Fujidenzo, Head, United Auctioneers, Pearl Garden Hotel, Babolat, Tyrecorp Inc., PVL Restaurant, Greenfield Marketers One, Mary Grace Foods Inc., Coca-Cola Philippines-FEMSA, Kraut Art Glass, Manuel Misa at Atty. Antonio Cablitas.
Lalarga ngayong araw ang singles finals tampok ang bakbakan nina four-time champion Marian Jade at reigning titlist Clarice Patrimonio sa women’s division sa alas-10 ng umaga kasunod ang duwelo nina defending champion Patrick John Tierro at ITF juniors campaigner John Bryan Otico sa men’s class.
- Latest
