Thunder ginulpi ang Bulls

OKLAHOMA CITY — Naglista si Russell Westbrook ng 21 points at 7 assists para tulungan ang Thunder na pulutanin ang Chicago Bulls, 92-79  at kunin ang kanilang ikatlong sunod na panalo.

Nagbalik naman si Carmelo Anthony sa Thunder lineup matapos magkaroon ng sore lower back at tumapos na may 18 points at 11 rebounds habang kumolekta si Jerami Grant ng 15 points at 11 rebounds.

Nauna nang nahulog ang Oklahoma City sa isang four-game losing slump bago nakabangon sa paghataw ng tatlong sunod na panalo.

Umiskor naman sina Lauri Markkanen at Antonio Bla­keney ng tig-16 points para sa Chicago habang nagdagdag si Denzel Valentine ng 13 markers.

Kaagad itinala ng Thunder ang 27-7 abante sa pagtatapos ng first quarter kung saan nagtala ang Bulls ng masamang 2-of-16 fieldgoal shooting.

Sa Charlotte, dumiretso ang Cleveland Cavaliers sa kanilang unang three-game streak ngayong season matapos gibain ang Hornets, 115-107.

Kumamada si LeBron James ng 31 points at  8 assists, samantalang nagposte si Kevin Love ng double-double sa kanyang 22 points at 10 rebounds para sa Cleveland.

Nag-ambag si Jeff Green ng 13 markers mula sa bench kasunod ang 10 points ni JR Smith para sa Cavaliers, nauna nang tinalo ang Dallas at New York.

Binanderahan ni Michael  Kidd-Gilchrist ang Hornets mula sa kanyang 22 points.