Japan sa depensa sasandal vs Gilas Pilipinas

MANILA, Philippines — Ilang beses nang nakaharap ng Japan ang Gilas Pilipinas  at alam na nila kung ano ang lakas ng Nationals.

Sa ulat sa fiba.com ay tinukoy ni Japanese star point guard Yuki Togashi ang husay ng mga Pinoy cagers sa one-on-one plays, partikular na sina Terrence Romeo, Jayson Castro at four-time PBA MVP June Mar Fajardo.

“The Philippines are very strong with their one-on-one plays. It's as if they are playing street ball,” sabi ni Togashi.

Magsasagupa ang Gilas at Japan sa Nobyembre 24 sa Komazawa Gymnasium sa Tokyo sa pagsisimula ng FIBA Basketball World Cup 2019 Asian Qualifiers.

Nasa Group B ang Pilipinas sa 'home-and-away' series ng Asian World Cup qualifiers kasama ang Japan, Chinese-Taipei at Australia habang nasa Group D naman ang Iran, Kazakhstan, Qatar at Iraq.

Ang Top Three teams sa nasabing dalawang grupo ang maglalaban sa susunod na yugto ng torneo.

Ang Top Seven squads mula sa 16 teams sa qua­lifying event ang makakakuha ng tiket para sa 2019 World Cup sa China.

Ang mahigpit na depensa ang itatapat ng mga Japanese sa mainit na opensa ng Nationals.

“We have to step up on defense, including myself, and then from there we have to make sure to get the defensive rebounds, which has been a problem for us,” wika ng 5-foot-6 guard na si Togashi.

Matapos ang Japan ay haharapin ng Gilas Pilipinas ang Chinese-Taipei sa Nobyembre 27 sa Smart Araneta Coliseum at ang Australia sa Pebrero 22 ng 2018 sa Australia.