Teng, Perkins may kontrata na
MANILA, Philippines — May hanggang ngayong araw na lamang ang mga PBA teams para bigyan ng offer sheet ang mga players na kanilang kinuha sa nakaraang 2017 PBA Rookie Draft.
Magiging free agent ang mga rookies sakaling hindi sila latagan ng kontrata ng mga koponang pumili sa kanila noong Linggo.
Nagkasundo na para sa detalye ng kanilang mga kontrata sina No 1 overall pick Christian Standhardinger ng San Miguel at No. 2 selection Kiefer Ravena ng NLEX, habang wala pang kontratang naihahain ang Blackwater para kay No. 3 pick Raymar Jose.
Nauna nang binigyan ng Elite si Allein Maliksi ng contract-extension na nagkakahalaga ng P10.08 milyon sa susunod na dalawang taon.
Pareho namang binigyan ng Phoenix at Alaska ng P8.55-million three-year maximum contracts sina No. 4 overall pick Jason Perkins at No. 5 selection Jeron Teng, ayon sa pagkakasunod.
Kapwa tatanggap ang 6-foot-5 na si Perkins at ang 6’2 na si Teng ng magkatulad na P150,000 kada buwang suweldo sa darating na season kasunod ang P225,000 sa 2018-19 at P337,500 sa 2019-20.
Maliban kay Perkins, pursigido rin ang Fuel Masters na bigyan ng kontrata sina rookies Sidney Onwubere, Jayson Grimaldo, Wilson Baltazar, Roldan Sara at John Karlo Casino.
Napirmahan na ni Perkins ang kanyang kontrata sa Phoenix, gagabayan ni bagong head coach Louie Alas, habang malalagdaan naman ni Teng ang kanyang kontrata pagdating ni Alaska top official Dickie Bachmann mula sa United States.
Hiniling ni Teng na mapasama sa Aces ang kanyang kuyang si Jeric, ang No. 12 overall pick ng Rain or Shine noong 2013 PBA Rookie Draft kaya posibleng pakawalan na ng Alaska si second-round pick Davon Potts ng San Beda Red Lions.
- Latest