SMC bloc makikipag-ayos sa Majority bloc

MANILA, Philippines — Hindi na dapat pang lumaki ang problema.

Mismong ang SMC bloc ang lalapit sa majo­rity bloc para tuluyan nang wakasan ang kanilang hindi pagkakaunawaan kaugnay sa estado ni PBA Commissioner Chito Narvasa.

“With the best interest of the league in mind, we have come to an agreement to reach out to the o­ther members of the Board to resolve this impasse as a collegial body, not as individuals, to maintain the integrity of the PBA (Philippine Basketball Association) and protect the interest of fans nationwide,” sabi kahapon ng SMC bloc sa kanilang official statement.

Ang SMC bloc ay binubuo ng San Miguel, Barangay Ginebra, Star, Globalport at Kia, habang ang majority bloc ay kinabibilangan ng TNT Katropa, Meralco, NLEX, Alaska, Rain or Shine, Phoenix at Blackwater.

Kamakalawa ay nagkasundo ang majority bloc na huwag nang bigyan ng panibagong termino si Narvasa.

Ito ay matapos payagan ni Narvasa na matuloy ang trade sa pagitan ng San Miguel at Kia para sa hawak ng huling No. 1 overall pick ng 2017 PBA Rookie Draft.

Ginamit ito ng Beermen, nagbigay ng tatlong role players at isang 2019 draft pick sa Picanto, para makuha si 6-foot-8 Fil-German Christian Standhardinger bilang No. 1 overall selection noong nakaraang Linggo.

“We trust we would be able to resolve issues concerning Commissioner Narvasa’s tenure and o­ther matters regarding the PBA’s future direction in the upcoming Annual Planning set on Nov. 14, with fitting dignity and decorum,”  wika pa ng SMC bloc.

Umapela ang nasabing grupo sa majority bloc na huwag nang maglabas ng anumang pahayag habang hindi pa nareresolbahan ang kanilang problema.

“In the meantime, we appeal to the other members of the board to refrain from issuing any statement, making further comments, assumptions and judgments until after we deli­berate on, and settle, this standoff,” sabi ng minority bloc.

“Accordingly, the PBA will proceed with the normal course of its business operations within the parameters of its bylaws and Constitution.”