Petecio, Villegas tangka ang quarterfinals

Casin sibak kay Komura

MANILA, Philippines — Magtatangkang humirit ng silya sa quarterfinals sina World Championship silver medalist Nesthy Petecio at Baguio City standout Aira Villegas sa pakikipagtipan sa kani-kanilang karibal ngayong araw sa 2017 Asian Boxing Confederation (ASBC) Asian Women’s Boxing Cham­pionships na ginaganap sa Ho Chi Minh City, Vietnam.

Makakasagupa ng Incheon Asian Games silver medalist na si Petecio si Rio Olympics silver meda­list Yin Jun Hua ng China sa featherweight class (57 kg.) habang titipanin naman ni Villegas si Jayasinghe Arachchilage Dulani Jaya ng Sri Lanka sa flyweight category (48-51 kg.).

Nalagasan na ang three-woman boxing team na ipinadala ng Association of Boxing Alliances in the Philippines (ABAP) matapos yumuko si Cagayan de Oro City pride Judelyn Casin kay Tsubasa Komura ng Japan sa first round ng light flyweight (45-84 kg.) kahapon.

Umaasa ang national coaching staff na binubuo nina Olympian Roel Velasco, Pat Gaspi at Violito Payla na malalampasan ng Pinay squad ang isang pilak na nakamit ng Pilipinas noong 2015 edisyon na ginanap sa Wulanchabu, China.

Nanggaling ang pilak kay Petecio na natalo kay Southeast Asian Games champion at Rio Olympics veteran Peamwilai Laopeam ng Thailand sa finals.