Narvasa out

Santos itinalagang OIC

MANILA, Philippines — Kagaya ng inaasahan, hindi na binigyan ng PBA Board of Governors si Chito Narvasa ng panibagong termino bilang Commissioner ng liga.

Sa isang special board meeting kahapon ay nagpasa ng resolusyon ang PBA Board para huwag nang palawigin ang pamamahala ni Narvasa matapos ang 42nd season.

Pinangunahan ni incoming league chair Ra­moncito Fernandez ng NLEX ang naturang pagpupulong na dinaluhan nina Patrick Gregorio ng TNT Katropa, Al Panlilio ng Meralco, Mert Mondragon ng Rain or Shine, Dickie Bachmann ng Alaska, Silliman Sy ng Blackwater at Raymond Zorrilla ng Phoenix.

Hindi naman nagpakita ang mga kinatawan ng San Miguel, Ginebra, Star, Globalport at Kia habang wala ang anino ni Narvasa sa kanyang opisina.

Nilinaw ni Fernandez na hindi nila sinibak si Narvasa bilang PBA Commissioner dahil kailangan nila ng boto ng two-thirds ng PBA Board o walong miyembro para magawa ito.

“We know that it takes a two-thirds vote to expel him,” wika ni Fernandez. “We are just letting his term expire at the end of the 42nd season because it also takes two-thirds to vote and renew the term of the Commissioner.”

Ayon pa kay Fernandez, walang kontratang pinanghahawakan si Nar­vasa dahil taun-taon lamang siya iniluluklok bilang PBA Commissioner.

“Rickie Santos, currently the PBA’s deputy commissioner for basketball operations, was appointed as officer-in-charge to ensure the continuity of the league’s operations.

Umupo si Narvasa bilang PBA Commissioner noong Agosto ng 2015 matapos palitan si Chito Salud.

Ang sinasabing bagay na nagpainit ng ulo ng mga independent members ng PBA Board ay ang pagpa­yag ni Narvasa na mangyari ang trade sa pagitan ng Kia at San Miguel.

Ibinigay ng Picanto ang kanilang No. 1 overall pick sa 2017 PBA Rookie Draft sa Beermen na ginamit ito para makuha si 6-foot-8 Fil-German Christian Standhardinger.

“What we have in mind in for the good of the league so we’d like to do it in a very professional way. And also for the future of the league, to make it a better league,” wika ni Fernandez.

Samantala, inihayag naman ni Fernandez ang pagkakahirang ng PBA Board kay Santos, ang kasalukuyang deputy commissioner for basketball operations ng PBA, bilang officer-in-charge para sa patuloy na operasyon ng liga.

Magsisimula ang 43rd season ng PBA sa Dis­yembre 17.