Black dismayado sa tawag ng mga referee
MANILA, Philippines — Hindi naitago ni coach Norman Black ang kanyang pagkadismaya sa kabiguan ng Meralco sa Barangay Ginebra sa Game Seven ng 2017 PBA Governor’s Cup Finals noong Biyernes sa harap ng league record na 54,086 fans sa Philippine Arena sa Bocaue, Bulacan.
Ayon kay Black, maraming kuwestiyunableng tawag sa 101-96 panalo ng Gin Kings laban sa Bolts.
“I wasn’t very happy with the way the game was governed tonight and I don’t want to give the commissioner any money,” wika ng one-time PBA Grand Slam champion mentor. “I’d just leave it at that, okay? Thank you.”
Naging mahirap ang pinagdaanan ng Meralco bago nakapasok sa kanilang ikalawang sunod na Finals appearance sa season-ending conference.
Matapos sibakin ang Blackwater Elite sa quarterfinals ay winalis naman ng Bolts ang Star Hotshots sa best-of-five semifinals series.
Naisuko ng Meralco ang Games One at Two sa Ginebra bago naagaw ang Games Three at Four patungo sa panalo sa Game Six para itulak ang Game Seven.
Sinabi ni Bolts’ assistant Luigi Trillo, ilang mahalagang tawag ang pumabor sa Gin Kings nang makabangon sila mula sa 20-point deficit at makalapit sa apat na puntos sa dulo ng fourth quarter.
“They made some shots. Obviously, there were calls that were tough down the stretch,” wika ni Trillo. “They called certain backings, we thought there was a backing but Ginebra played well in the start.”
- Latest
