Tres ni Wiggins nagsalba sa Timberwolves
OKLAHOMA CITY -- Nagsalpak si Andrew Wiggins ng isang three-pointer ilang hakbang malapit sa halfcourt sa pagtunog ng final buzzer para itakas ang Minnesota Timberwolves laban sa Thunder, 115-113.
Tumapos si Wiggins na may 27 points habang humakot si Karl Anthony-Towns ng 27 points at 12 rebounds para sa paglusot ng Minnesota.
“You take them any way you can get them,” wika ni Minnesota coach Tom Thibodeau kay Wiggins. “Great shot by a great player.”
Nauna nang naikonekta ni Carmelo Anthony ang kanyang 3-pointer sa natitirang 5.1 segundo para ibigay sa Oklahoma City ang 113-112 bentahe.
Matapos ito ay nakuha ni Wiggins ang inbound pass at nakakuha ng solidong pick mula kay Towns bago isalpak ang kanyang buzzer-beating triple sa panig ng Timberwolves.
“Everything worked perfectly,” sabi ni Wiggins. “Taj (Gibson) found me. KAT (Towns) had a great screen. When it left my hands, the release felt amazing.”
Humugot si Russell Westbrook ng 15 sa kanyang 31 points sa fourth quarter para sa Thunder, nanggaling sa kabiguan laban sa Utah Jazz noong Sabado.
Nagdagdag si Anthony ng 23 points habang may 14 markers si Paul George mula sa kanyang 6-for-20 fieldgoal shooting.
Humakot naman si center Steven Adams ng 17 points at 13 rebounds para sa Oklahoma City.
- Latest