PSC gusto nang malaman ang mga plano ng NSAs
VIGAN CITY, Ilocos Sur, Philippines — Ngayon pa lamang ay gusto nang alamin ng Philippine Sports Commission ang plano ng mga National Sports Associations para sa susunod na taon.
Isa-isang tatanungin ng PSC, nasa ilalim ng pangangasiwa ni chairman William ‘Butch’ Ramirez, ang bawat pangulo ng NSA tungkol sa kanilang mga programa para sa 2018.
Partikular na sa tatalakayin sa nasabing one-on-one consultative meeting ay ang paghahanda ng bansa para sa 2018 Asian Games sa Jakarta, Indonesia.
“We will ask them kung ano ang mga programa nila for next year at kung magkano ang balak nilang hinging budget para sa mga ito,” wika kahapon ni PSC Commissioner Charles Maxey.
Nauna nang sinabi ni Ramirez na maghihigpit ang PSC sa pagbibigay ng pondo para sa mga NSAs na walang naipapakitang solidong programa para sa mga sinalihang international competitions.
“The meeting will give us a serious look into the future,” ani Ramirez sa kanilang pakikipag-usap sa mga NSA leaders. “Ang magiging priority ng PSC ay ‘yong mga NSAs na may magandang performance at ‘yong mga kasali sa individual events,” wika naman ni Maxey.
Kamakailan ay inihayag ng sports commission ang pagbibigay ng prayoridad sa 20 hanggang 25 elite athletes na lalahok sa 2018 Indonesia Asian Games hanggang sa 2020 Olympic Games sa Tokyo, Japan.
Kabilang sa mga inaasahang makakasama sa elite group ay ang mga gold medalists sa nakaraang 29th Southeast Asian Games sa Kuala Lumpur, Malaysia at sa 5th Asian Indoor and Martial Arts Games (AIMAG) sa Turkmenistan.
- Latest
