Philippines hosting bid para sa 2023 World Cup suportado ni Duterte
Nasa larawan si President Rodrigo Roa Duterte (gitna) habang nakatikom ang kamao kasama ang mga opisyales ng Federation Internationale de Basketball (FIBA) sa courtesy call na ginanap sa Mahogany Room ng Manila Hotel nitong Huwebes ng gabi. Nasa larawan din sina businessman Manny V. Pangilinan, chairman emeritus ng Samahang Basketbol ng Pilipinas, Executive Secretary Salvador Medialdea, Philippine Sports Commission (PSC) chairman William Ramirez, SBP executive director Sonny Barrios at Special Assistant to the President Christopher Lawrence Go. (Richard Madelo/Presidential photo)
MANILA, Philippines — Mismong si Pangulong Rodrigo Duterte ang nagbigay ng solidong suporta upang makuha ng Pilipinas ang hosting rights sa prestihiyosong 2023 FIBA Basketball World Cup.
Mainit na tinanggap ni Duterte ang three-man FIBA Evaluation Commission na pinamumunuan nina FIBA Central Board at Commission president Hamane Niang ng Mali, FIBA Central Board member at treasurer Ingo Weiss ng Germany at Adviser to the FIBA secretary-general Lubomir Kotleba ng Slovak Republic.
Kasama ng FIBA officials sina Samahang Basketbol ng Pilipinas chairman emeritus Manny Pangilinan at Philippine Sports Commission chairman Butch Ramirez sa courtesy call na ginanap sa Mahogany Room ng Manila Hotel.
Dumalo rin sina Executive Secretary Salvador Medialdea, Special Assistant to the President Christopher Lawrence Go, SBP president Al Panlilio, SBP executive director Sonny Barrios at SBP deputy executive director for international affairs Butch Antonio.
Magsasagawa ang FIBA ng dalawang araw na ocular inspection sa Philippine International Convention Center, Smart Araneta Coliseum, Mall of Asia Arena at Philippine Arena na siyang mga gagamiting venues sa world meet.
Kasama ng Pilipinas sa co-hosting ng FIBA World Cup ang Japan at Indonesia.
Umaasa ang tatlong bansa na igagawad ng FIBA Central Board ang basbas nito sa Disyembre - ang petsa kung kailan isisiwalat ang magiging host ng FIBA World Cup.
Lalahukan ang World Cup ng 32 bansa mula sa iba’t ibang panig ng mundo.
Ang 2023 World Cup din ang magsisilbing qualifying tournament para sa 2024 Olympic Games sa Paris, France.
Nauna nang nagtangka ang Pilipinas na makuha ang 2019 FIBA World Cup subalit natalo ito sa bidding laban sa China sa botong 14-7 pabor sa Chinese noong Agosto 2015.
- Latest
