Pinoy cue artists kakasa sa Straight Pool Championship
MANILA, Philippines — Babanderahan ni reigning world champion Lee Vann Corteza ang kampanya ng Pilipinas sa 2017 American 14.1 Straight Pool Championship na magsisimula ngayong araw sa Diamond Billiards sa Midlothian, Virginia sa US.
Matapos magkampeon sa 2017 World 14.1 Straight Pool Championship, umaasa si Corteza na maipagpapatuloy nito ang kanyang magandang ratsada kasama sina Dennis Orcollo, Warren Kiamco, Alex Pagulayan at World Games at Southeast Asian Games 9-ball pool singles gold medalist Carlo Biado.
Nasa Group 5 si Corteza kasama sina 2016 World 14.1 Straight Pool champion Mika Immonen ng Finland, David Alcaide ng Spain, Danny Barouty ng Amerika, Kai Lun Hsu ng Chinese-Taipei at Don Polo ng Amerika.
Lalarga naman si Orcollo sa Group 7 na kinabibilangan nina Americans John Schmidt, Max Eberle, Michale Yednak at Mike Davis habang nasa Group 6 si Pagulayan kasama sina Jayson Shaw ng Scotland, Francisco Sanchez-Ruis ng Spain at sina Bob Hunter at James Gazafi ng Amerika.
Pasok sa Group 8 si Kiamco gayundin sina Ralf Souquet ng Germany, Chris Melling ng Great Britain, Mario He ng Austria, Petri Makkonen ng Finland at Alan Duty ng Amerika samantalang nasa Group 4 si Biado kasama sina four-time World 14.1 Straight Pool Championship winner Thorsten Hohmann ng Germany, reigning World 9-Ball champion Albin Ouschan ng Austria at Bob Maidhof ng Amerika.
Sasabak si reigning American 14.1 Straight Pool champion Neils Feijen ng Netherlands sa Group 3 laban kina Lo Li Wen ng China, Denis Grabe ng Estonia, WPBA Hall of Famer Karen Corr ng Great Britain at Konrad Juszczyszyn ng Poland.
Nakalaan ang kabuuang $41,000 premyo kabilang ang $10,000 para sa magkakampeon at $6,000 sa runner-up.
Ang tatlong mangungunang manlalaro sa bawat grupo ang siyang uusad sa knockout stage. Makasisiguro ng first-round bye ang mga topnotchers sa bawat grupo.
- Latest