Veterans, Gilas Cadets sabay na magsasanay

MANILA, Philippines — Matapos ang PBA Governors’ Cup, agad na magsisimula ang pagsasanay ng Gilas Pilipinas na sasabak sa FIBA Asia/Pacific na siyang magsisilbing qualifying series para sa FIBA World Cup.

Agad na ipatatawag ang mga miyembro ng Gilas Pilipinas at Gilas Cadets para simulan ang pagsasanay sa Nobyembre 3.

Sabay na sisimulan ng veterans at cadets ang ensayo hindi tulad dati kung saan ang Gilas Pilipinas members ay pinahihintulutan na makapagsanay 15 araw bago magsimula ang torneo habang ang Gilas Cadets naman ay inire-release ng kanilang mother clubs 60 araw bago ang bakbakan.

Ito ay nakasaad sa Memorandum of Agreement (MOA) ng Samahang Basketbol ng Pilipinas at PBA para sa international competitions na lalahukan ng pambansang koponan gaya ng Asian Games, FIBA Asia Cup o qualifying tournament para sa World Cup at Olympics. 

“It used to be 60 days for cadets and 15 days for veterans but there’s no such thing now for the Nov. 3 start. Everything is fluid at this point. It depends on what the new arrangements are,” ani Gilas Pilipinas head coach Chot Reyes.

Wala pang inisyal na listahan ng Gilas pool ngunit mag-uusap na sina Reyes at PBA commissioner Chito Narvasa para rito kung saan posibleng madagdagan ang dating pool depende sa clearance na ibibigay ng mother clubs.

Ayon sa kasunduan, magpapahiram ang mga PBA teams ng dalawang manlalaro para sa Gilas-isang cadet at isang bete­rano.

May 31 manlalaro ang sumabak sa Jones Cup, FIBA Asia Cup, Southeast Asian Games at FIBA Asia Champions Cup.

Naglaro sina Terrence Romeo, Carl Bryan Cruz, Gabe Norwood, Jio Jalalon, Jayson Castro, Raymond Almazan, June Mar Fajardo, Roger Pogoy, Calvin Abueva, Japeth Aguilar, Christian Standhardinger at Matthew Wright sa FIBA Asia Cup.

 Makakasagupa ng Gilas Pilipinas ang Japan sa Nobyembre 24.