Irving, Celtics pinasiklaban ni James
Hayward out na sa season, paa lumaylay
CLEVELAND - Hindi naging maganda ang pagbabalik ni Kyrie Irving sa Cleveland.
Kumamada si LeBron James ng 29 points – ang 13 dito ay kanyang iniskor sa fourth quarter – sa kabila ng iniindang sprained left ankle para banderahan ang Cavaliers sa 102-99 panalo laban sa bisitang Boston Celtics.
Ang pasa ni James kay Kevin Love para sa krusyal nitong 3-pointer sa huling 46.3 segundo ang nagbigay sa Cavs ng 102-98 abante laban sa Celtics.
Nagkaroon si Irving, naglaro ng anim na seasons para sa Cleveland, ng tsansang maitabla ang laro ngunit nagmintis ang kanyang 3-pointer sa pagtunog ng final buzzer.
Matapos ito ay niyakap ni Irving si James, ang kanyang teammate sa loob ng tatlong seasons.
Tumapos si Irving na may 22 points sa panig ng Celtics, nakabangon mula sa 18-point deficit sa third period at inagaw ang unahan sa huling 2:04 minuto.
Nabangga naman ni James si Gordon Hayward, pumirma ng four-year, $128 million free agent contract sa Celtics, sa kanyang tangkang pagsapo sa isang alley-oop pass sa 6:45 minuto ng first quarter.
Nagkabuhol ang tuhod ni Hayward at masama ang naging pagbagsak sa sahig.
Ang naturang injury ng 27-anyos na si Hayward ang nagpabago sa inaabangang season opener sa pagitan ng dalawang best teams sa liga.
Mangangailangan si Hayward ng surgery at ilang buwan para makarekober.
Ang crosscourt pass ni James kay Love ang nagresulta sa triple ng forward para sa four-point cushion ng Cleveland kasunod ang free throw ni Irving na naglapit muli sa Boston sa 99-102 agwat.
Tumapos si Love na may 15 points habang may 14 markers si Derrick Rose sa kanyang debut para sa Cavs.
Sa pagtunog ng final horn ay ginawa nina James at Irving, nagpalitan ng matatalim na salita matapos ang blockbuster trade, ang kanilang signature handshake at binati ang All-Star point guard ng kanyang mga dating teammates.
Ilang beses ding binuska si Irving sa tuwing hahawakan niya ang bola.
- Latest