Pagbuo sa unified collegiate sports suportado ng PSC
MANILA, Philippines — Nabigo umano ang Philippine Sports Commission sa kanilang mandato tungkol sa pag-angat sa grassroots development ng sports sa nakaraang 27 taon.
Ito ang pahayag ni PSC chairman William “Butch” Ramirez na umaasa na sa pamamagitan ng National Consultative Meeting on Collegiate Sports na inumpisahan kahapon hanggang ngayon, mabibigyan ng solusyon ang naka-binbin na programa.
Mahigit 98 sa kabuuang 140 universities at colleges sa buong bansa ang dumalo sa Consultative Meeting para sa collegiate sports sa Philsports Complex, Pasig City.
Sa ikalawang araw ng pagtitipon ngayon, nakatakdang magdesisyon ang mga delegado kabilang mula sa UAAP, NCAA at ibang sports associations sa Visayas at Mindanao kung magtatayo ba ng panibagong nationwide athletic associations.
Ang naturang planong pagbuo ng nationwide athletic association ay sinuportahan naman ng karamihan sa mga delegado kabilang na sina dating PSC commissioner Chito Loyzaga na ngayon ay athletic director ng NU, Paul Supan ng Jose Rizal University at NCAA at dating Senador Nikki Coseteng, may-ari ng Diliman College sa Quezon City.
Sinabi pa ni Ramirez na susuportahan ng PSC kung anuman ang magiging desisyon ng mga delegado.
Sa panig naman ng Kongreso, nangako si Rep Mark Zambar na isang miyembro ng Youth and Sports Development Committee ng suporta para sa pagpapatayo ng unified collegiate sports.
- Latest